Një pervers i neveritshëm, i cili ngacmoi seksualisht pesë vajza të mitura duke u nuhatur dhe prekur këmbët, është dënuar me burg pas një ndjekjeje trevjeçare nga policia. Alexander Scott-Bowen, 24 vjeç, u afrohej vajzave në rrugë për të kënaqur fetishin e tij të pazakontë seksual, përpara se policia të arrinte më në fund ta gjente. Ai u dënua me 38 javë burg për shtatë raste të sulmit seksual të kryera midis viteve 2022 dhe 2026, nga Gjykata e Kurorës në Bristol të premten.
Policia nisi hetimet fillestare në vitin 2022, pasi mori raportime për një burrë që iu ishte afruar tre vajzave të mitura dhe u kishte nuhatur këmbët në muajt janar, mars dhe maj. Pavarësisht një apeli publik në media, ku u publikua edhe një portret i krijuar me kompjuter, si dhe identifikimit të disa personave të dyshuar, nuk kishte prova të mjaftueshme për të ngritur akuza ndaj ndonjërit prej tyre. Çështja u pezullua në pritje të raportimeve apo dëshmive të tjera. Por në mars të vitit 2025, policia mori edhe dy raportime të tjera nga vajza të reja, të cilave u ishte afruar një burrë në Kingswood në rrethana të ngjashme.
U nis një hetim i dytë dhe i dyshuari i ri u identifikua si Scott-Bowen, i cili më pas u lidh edhe me sulmet e vitit 2022. Kjo çoi në arrestimin e tij më 11 mars, ku ai u mor në pyetje dhe më pas u la i lirë me kusht, ndërsa oficerët vijuan hetimet. Ndërsa ishte i lirë me kusht, Scott-Bowen goditi sërish në Cribbs Causeway në natën e ndërrimit të viteve, pasi iu afrua dy vajzave. I dyshuari iu afrua edhe një gruaje në Stoke Gifford, më 21 janar të këtij viti, duke i bërë një kërkesë të ngjashme.
Policia e arrestoi tre ditë pasi mori raportimet shqetësuese, ndërsa Shërbimi i Prokurorisë së Kurorës ngriti shtatë akuza për sulm seksual ndaj viktimave. Në të gjitha rastet, Scott-Bowen u hapte viktimave një bisedë të zakonshme, komentonte për këpucët e tyre dhe më pas u kapte papritur këmbën dhe ua nuhaste.
Fillimisht, policia dyshoi se ai mund të ishte përgjegjës për incidentet e vitit 2022 në Yate, pasi në atë kohë jetonte në zonë dhe veshja e tij përputhej me përshkrimin e dhënë nga njëra prej viktimave. Megjithatë, në atë moment nuk kishte prova të mjaftueshme për ta konfirmuar këtë me siguri. Pas arrestimit të tij në vitin 2025, policia mori ADN-në e tij dhe e gjeti atë në lidhësen e këpucës së njërës prej viktimave të vitit 2022. Më pas, ai u lidh edhe me një prej incidenteve të vitit 2025, pasi një viktimë e identifikoi pozitivisht si autor të sulmit, shkruan “Sun”.
Pas arrestimit të tij për herë të tretë, në janar të vitit 2026, policia sekuestroi telefonin e tij celular dhe zbuloi materiale që sugjeronin se ai kishte një fetish për këmbët. Ai u paraqit para gjykatës më 6 korrik të këtij viti, ku u deklarua fajtor për të shtatë akuzat e sulmit seksual. Meqenëse kishte qëndruar në paraburgim që nga janari i këtij viti, ai tashmë e ka kryer periudhën e dënimit dhe është liruar nga burgu. Gjykata vendosi gjithashtu një urdhër 10-vjeçar për parandalimin e dëmit seksual, ndërsa ai është regjistruar në Regjistrin e Autorëve të Krimeve Seksuale për 10 vitet e ardhshme.
Detektivi i lartë, Mike Coleman, tha: “Këto sulme shkaktuan shqetësim të madh te viktimat dhe komuniteti në përgjithësi dhe jemi të kënaqur që Scott-Bowen është dënuar për këto krime. Gjatë gjithë këtij hetimi, ne ishim të qartë në qëndrimin tonë se këto incidente duhej të trajtoheshin për atë që ishin në të vërtetë, një seri sulmesh seksuale, kryesisht ndaj vajzave të reja. Scott-Bowen i kreu veprat e tij për një periudhë të gjatë dhe nuk u pengua as nga arrestimi dhe lirimi me kusht dhe me masa kufizuese, pasi vazhdoi të kryente vepra të tjera.”