JK Rowling është shprehur se nuk do t’i falë kurrë aktorët Emma Watson dhe Daniel Radcliffe për mbështetjen që ata kanë ofruar për të drejtat e transgjinorëve, pas komenteve të saj të kontestuara mbi komunitetin trans. Krijuesja e Harry Potter ka qenë nën kritikë të ashpra për disa komente që bëri në vitin 2020 lidhur me transgjinorët, duke shkaktuar një polemikë të madhe. Gjatë pandemisë së Covid-19, Rowling shpërndau një artikull që përdorte frazën “people who menstruate” dhe talli përpjekjet për të përfshirë individët trans, duke sugjeruar se kishte harruar fjalën “grua”. Kjo shkaktoi një reagim të fortë nga shumë njerëz, përfshirë dy aktorët e Harry Potter, Emma Watson dhe Daniel Radcliffe.
Radcliffe publikoi një ese në mbështetje të komunitetit trans, duke kërkuar falje për “dhimbjen” që komentet e Rowling shkaktuan, ndërsa Watson u shpreh se ajo dhe shumë të tjerë i respektonin dhe i donin transgjinorët për atë që ishin.
Së fundmi kur një përdorues i Twitter kërkoi që Radcliffe dhe Watson të kërkonin falje nga Rowling, ajo u përgjigj duke thënë se ata nuk mund të ishin “të sigurt” që ajo do t’i falte. Ajo kritikoi publikisht aktorët që mbështetën lëvizjen për të drejtat e transgjinorëve, duke thënë se mund të kursenin faljet e tyre për ata.
Rowling ka mbrojtur disa herë qëndrimet e saj, duke refuzuar të ndryshojë mënyrën se si përdor gjuhën për të përshkruar individët trans dhe duke sugjeruar se do të ishte e gatshme të vuante dënimin për këtë qëndrim. Kjo ka çuar në një ndarje të qartë mes saj dhe aktorëve që dikur ishin pjesë e projektit të suksesshëm Harry Potter.