Transmetuesi publik belg VRT ka vendosur të shtyjë konfirmimin për pjesëmarrjen në edicionin e ardhshëm të Eurovisionit, duke kërkuar më shumë kohë për të diskutuar me Unionin Evropian të Transmetimeve (EBU) rregullat e konkursit dhe çështjen e pjesëmarrjes së Izraelit.
VRT duhej të merrte një vendim deri më 15 shtator, por i ka kërkuar EBU-së shtyrjen e afatit. Kërkesa është pranuar, ndërsa transmetuesi konfirmoi se diskutimet me EBU-në vijojnë ende.
“Jemi në dialog me EBU-në lidhur me shqetësimet që kemi ngritur më herët. Diskutimet janë ende në zhvillim”, deklaroi VRT.
Transmetuesi belg ka vënë në pikëpyetje më herët nëse një shtet i përfshirë në një konflikt të armatosur në shkallë të gjerë duhet të lejohet të marrë pjesë në Eurovision.
Në qendër të diskutimit janë edhe rregullat e EBU-së për natyrën politike dhe të paanshme të konkursit. VRT kërkon më shumë qartësi dhe transparencë mbi mënyrën se si këto rregulla zbatohen ndaj vendeve pjesëmarrëse.
Belgjika nuk është i vetmi vend që po shqyrton pjesëmarrjen. Edhe transmetuesi publik holandez ka kërkuar kohë shtesë nga EBU për të vendosur nëse Holanda do të marrë pjesë në konkursin e ardhshëm.
Debati mbi pjesëmarrjen e Izraelit pritet të jetë një nga çështjet më të ndjeshme përpara zhvillimit të Eurovisionit.