Benny Blanco ka folur hapur për dëshirën për t’u bërë baba dhe për perspektivën e krijimit të një familjeje me bashkëshorten e tij, këngëtaren Selena Gomez.
Producenti 38-vjeçar i muzikës, gjatë një interviste në emisionin “Open Book with Jenna”, tregoi se nuk ka frikë nga atësia dhe se mezi pret ditën kur do të bëhet prind.
“Disa nga gjërat negative që përjetova në fëmijërinë time janë ato që më ndihmuan të arrija aty ku doja të isha dhe më dhanë guximin për të bërë diçka ndryshe”, tha Blanco.
Ai shtoi se dëshiron të jetë një prind dhe partner sa më i mirë.
“Nuk kam frikë. Sigurisht që dua të jem prindi më i mirë, partneri më i mirë. Jam i emocionuar dhe mezi pres atë ditë”, u shpreh ai.
Blanco foli gjithashtu për mënyrën se si e sheh dështimin dhe gabimet që mund të bëjë si prind. Sipas tij, përballja me vështirësitë dhe gabimet është pjesë e rëndësishme e rritjes së një fëmije.
“Jam i bindur se, kur të ndodhë më në fund, do të bëj gabime dhe kjo është në rregull. Dështimi në jetën reale është ai që do ta formësojë fëmijën tim, ai që do ta bëjë të bëjë disa gabime, por është edhe ai që do ta bëjë të veçantë”, tha producenti.
Deklaratat e tij vijnë vetëm pak ditë pasi Blanco u shfaq si bashkë-prezantues në “Today with Jenna & Sheinelle”, më 15 shtator. Gjatë emisionit, ai foli edhe për dëshirën e Selena Gomez për t’u bërë nënë.
Duke iu referuar dëshirës së çiftit për të pasur fëmijë, Blanco tha me shaka se po bën të pamundurën për ta shtyrë përpara këtë plan: “Po. Po e shtyj përpara. Po ushtroj gjithë presionin që mundem nga këtu”.
Selena Gomez kishte folur më herët për dëshirën e saj për t’u bërë nënë. Në një intervistë për Vanity Fair në shtator 2024, këngëtarja zbuloi se për shkak të problemeve shëndetësore nuk mund të mbajë vetë një shtatzëni.
“Nuk e kam thënë kurrë këtë, por për fat të keq nuk mund të lind një fëmijë. Kam mjaft probleme që do të vinin në rrezik jetën time dhe jetën e foshnjës. Kjo ishte diçka për të cilën duhej të vajtoja për një farë kohe”, kishte deklaruar Gomez.