Pas rikthimit të shumëpërfolur të sfilatës së Victoria’s Secret në Bruklin, një letër e hapur e modeles italiane Bianca Balti ka bërë jehonë në gjithë botën, duke u kthyer në simbol të guximit dhe forcës së grave që kanë mbijetuar nga kanceri.

Bianca, e cila kishte shprehur dëshirën për të marrë pjesë në pasarelë në emër të të gjitha grave që luftojnë me kancerin, zbuloi se kërkesa e saj ishte refuzuar nga kompania.

Në esenë e publikuar në platformën e saj “Substack”, modelja 40-vjeçare ndau letrën e plotë drejtuar markës së njohur të veshjeve intime, duke shkruar:

E dashur Victoria’s Secret, nuk jam më e reja, nuk kam trupin më perfekt, por jam e fortë, e gjallë dhe ende seksi. Dua të ec në pasarelë për të treguar se jeta vazhdon, edhe pas kancerit.

Balti, e cila në vitin 2024 zbuloi se vuante nga kanceri i vezoreve në stadin III, rrëfeu betejën e saj të gjatë me sëmundjen, nga diagnoza dhe operacionet, te kimioterapia dhe rikuperimi.

Më parë, ajo kishte bërë një mastektomi parandaluese pas zbulimit të mutacionit gjenetik BRCA1, që rrit rrezikun për kancer gjiri dhe vezorësh.

Gjatë gjithë trajtimit, Bianca ndau me publikun momente të vërteta e prekëse nga rrugëtimi i saj, përfshirë periudhën kur preu flokët dhe u shfaq në Festivalin Sanremo pa parukë, duke treguar me krenari plagët e betejës për jetën.

Në letrën e saj, modelja theksoi rëndësinë e përfaqësimit në botën e modës:

Një në tre gra përballet me kancer gjatë jetës. Një në tetë me kancer gjiri. Ne jemi nëna, motra, vajza — dhe jemi ende gra të bukura. Përfaqësimi nuk është luks, është domosdoshmëri.

Victoria’s Secret, sipas Biancës, iu përgjigj me mirësjellje, duke shpjeguar se kastingu për sfilatën ishte përfunduar.

Por për modelen italiane, mesazhi kishte më shumë rëndësi se vetë pjesëmarrja:

E provova, nuk ndodhi, por nuk pendohem. Kanceri më mësoi se jeta është shumë e shkurtër për të mos tentuar. Ne, gratë që kemi mbijetuar, jemi publiku juaj. Ne jemi klientet, nënat dhe vajzat tuaja. Dhe meritojmë të përfaqësohemi.

Letra e Biancës Balti është pritur me mbështetje të madhe nga publiku dhe komuniteti i grave që luftojnë me sëmundjen, duke u konsideruar si një thirrje e fuqishme për përfshirje të vërtetë dhe respekt ndaj grave që mbijetojnë e vazhdojnë të lulëzojnë pas kancerit.