Një çështje gjyqësore e fundit në Britani ka rikthyer emrin e familjes Beckham në vëmendjen e mediave, pasi Romeo Beckham është gjobitur për një shkelje të kryer gjatë drejtimit të automjetit në Londër.
Sipas dokumenteve të gjykatës dhe deklarimeve të policisë, incidenti ka ndodhur më 12 shtator në zonën e Westminster-it, ndërsa 21-vjeçari po drejtonte një Porsche 911 Carrera. Një oficer policie ka vënë re sjellje të dyshimtë të drejtuesit teksa automjeti kishte ndalur në semafor të kuq.
Në dëshminë e tij, oficeri ka deklaruar se e ka parë Beckham duke shikuar poshtë dhe duke përdorur telefonin celular, të cilin e kishte në nivelin e timonit. “E pashë duke lëvizur ekranin me gishtat e tij,” është shprehur ai në deklaratë.
Raportet e çështjes përmendin gjithashtu praninë e një qeni brenda makinës, i cili ndodhej në prehërin e pasagjerit pa rrip sigurimi apo mbajtëse të posaçme. Sipas policisë, kjo situatë kontribuoi në shpërqendrimin e drejtuesit dhe mungesën e kontrollit të plotë mbi automjetin në atë moment.
Pas hetimeve, çështja përfundoi në Westminster Magistrates’ Court, ku gjykata e shpalli përgjegjës për shkeljen. Romeo Beckham u gjobit me 440 paund, iu shtuan tre pikë në lejen e drejtimit, si dhe u detyrua të paguajë edhe shpenzimet gjyqësore dhe tarifat përkatëse sipas ligjit britanik.
Rasti ka tërhequr vëmendje mediatike edhe për faktin se sjell ndër mend një incident të ngjashëm të ndodhur më herët me babanë e tij, David Beckham, i cili në vitin 2019 pati gjithashtu probleme ligjore për përdorim telefoni gjatë drejtimit të automjetit.
