Këngëtarja e famshme, Britney Spears, i ka habitur të gjithë fansat e saj me veprimin e papritur që ka bërë së fundmi. Ajo ka fshirë llogarinë e saj personale në rrjetin social “Instagram”, pas postimeve që kishin shkaktuar shqetësim te ndjekësit e saj.
Gjithashtu edhe pas përballjes publike me ish-bashkëshortin, Kevin Federline, në lidhje me atë që ai zbuloi për martesën e tyre në librin e tij.
Që nga dita e djeshme, 2 nëntor, profili i këngëtares në “Instagram” nuk është më i arritshëm. “Profil i padisponueshëm”, ky është mesazhi që shfaqet nëse kërkon emrin në llogarinë e saj.
Fshirja e këtij profili erdhi pas javësh shqetësimi nga fansat për postimet e saj të çuditshme dhe të ngarkuara emocionalisht. Konkretisht, Britney Spears postoi video të saj duke kërcyer në dhomën e saj të ndenjes, por i çaktivizoi komentet, ndërsa mbishkrimet e saj përmbanin referenca misterioze për dy djemtë e saj, Sean Preston dhe Jaden James.
Në një video që postoi më 7 tetor, këngëtarja u shfaq me mavijosje në duar dhe fasha në kyçe. Në mbishkrim, ajo shpjegoi se kishte rënë nga shkallët, ndërsa përmendi gjithashtu se djemtë e saj ishin kthyer në Hawaii, ku jetojnë me babanë e tyre.
“Djemtë e mi u detyruan të largoheshin dhe të ktheheshin në Maui”, shkroi ajo, duke shtuar:
“Kështu shprehem dhe lutem përmes artit. Nuk dua shqetësimin apo mëshirën tuaj, dua vetëm të jem një grua e mirë dhe të shërohem. Dhe kam mbështetje të jashtëzakonshme, kështu që kalofshi një ditë të mbarë”.
Në të njëjtin postim, Britney shtoi:
“Rashë nga shkallët në shtëpinë e një shoqeje. Ishte e tmerrshme. Shpatulla ime del herë pas here, nuk jam e sigurt nëse është thyer, por tani për tani është ‘kthyer’ përsëri në vend. Faleminderit Zotit”.
Në një postim pasues më 19 tetor, Spears iu referua në mënyrë indirekte periudhës katërmujore që kaloi në një qendër rehabilitimi në vitin 2018, ndërsa ishte nën 13 vjet kujdestari.
“Pësova dëmtime në tru”, shkroi ajo, duke përshkruar ndikimin e asaj periudhe në jetën e saj.
Ndërkohë, në librin e ri të ish-bashkëshortit të saj , Kevin Federline , “Thoshe se e dije”, ai bën një sërë akuzash rreth Spears, martesës së tyre dhe marrëdhënies së saj me djemtë e tyre. Pjesë nga shkrimet e botuara nga “New York Times”, “USA Today” dhe “E! Online” përfshijnë akuza të forta për rolin e saj si nënë, aludime për pabesi dhe shqetësimet e Federline se “diçka e keqe” mund t’i ndodhte.
Spears u përgjigj më 15 tetor nëpërmjet platformës X (më parë Twitter), duke akuzuar Federline për “manipulim të vazhdueshëm” të saj dhe duke mbrojtur marrëdhënien e saj me fëmijët e tyre.
“Të të duan pa kushte dhe me një zemër të pafajshme si imja, ndërkohë që të kërcënojnë ose të bëjnë të besosh se je i keqi ndërsa ata përfitojnë nga dhimbja jote”, shkroi ajo.
