Cristiano Ronaldo duket se nuk ka ndërmend ta mbyllë ende historinë e tij me kombëtaren portugeze. Pavarësisht se karriera e tij ndodhet në një fazë të avancuar, kapiteni i Portugalisë vazhdon të jetë pjesë e planeve të skuadrës dhe i ka bërë të qarta objektivat që dëshiron të arrijë përpara se të vendosë për të ardhmen. Në konferencën për shtyp para sfidës me Uellsin, Ronaldo foli për gjithçka: nga ambiciet personale dhe trajneri i ri Jorge Jesus, te kritikat për moshën dhe mundësia që ky të jetë sezoni i fundit i tij.
Mes synimeve që ka vendosur për veten janë dy objektiva madhorë: të arrijë kuotën e 1000 golave në karrierë dhe të fitojë sërish Ligën e Kombeve me Portugalinë. “Objektivi im është i dyfishtë: goli i 1000-të dhe fitimi i Ligës së Kombeve”, deklaroi ai. Për Ronaldon, ardhja e Jorge Jesus në stolin e Portugalisë sjell një kapitull të ri. Dyshja e njeh mirë njëri-tjetrin pasi kanë punuar së bashku te Al Nassr dhe sezonin e kaluar fituan kampionatin saudit.
Kapiteni portugez e vlerësoi zgjedhjen e trajnerit, duke theksuar se njohja që shumë prej lojtarëve kanë me të mund ta bëjë më të lehtë përshtatjen me idetë e tij. Një pjesë e konferencës iu kushtua edhe zërave që kërkojnë largimin e Ronaldos nga kombëtarja. Sulmuesi reagoi me humor dhe tha se, pavarësisht kritikave, gjatë këtij viti ka ndjerë mbështetje të madhe. Ai la të kuptohet se nuk është i shqetësuar nga sulmet mediatike, duke përdorur një metaforë për t’iu përgjigjur kritikëve.
“E kuptoj që disa media përpiqen të më godasin, por vetëm me një pushkë. Edhe kështu, unë i shmang plumbat”, tha ai. Ronaldo pranoi gjithashtu se po mendon gjithnjë e më shumë për momentin kur do t’i japë fund karrierës. Edhe pse nuk përjashton mundësinë që ky të jetë sezoni i fundit, ai nuk ka vendosur ende një datë. “Është shumë e mundur që ky të jetë viti im i fundit, por do ta them kur të vijë koha”, u shpreh 41-vjeçari.
Në këtë fazë të karrierës, Ronaldo tha se rëndësi të veçantë ka edhe mënyra se si menaxhon ngarkesën fizike. Ai pranoi se nuk do të jetë në fushë për 90 minuta në çdo ndeshje, por siguroi se është i gatshëm të ndihmojë skuadrën në çdo rol që i kërkohet. “Jam në dispozicion të trajnerit për çdo gjë që ai ka nevojë, qoftë të luaj, të hyj nga stoli apo të mos luaj fare”, deklaroi ai.
Përballja me Uellsin do të ketë edhe një dimension emocional për Ronaldon. Ndeshja do të luhet në “Alvalade”, stadiumi ku ai nisi rrugëtimin e tij në futbollin profesionist. “Të rikthehem në vendin ku nisa është shumë bukur. Pas kaq shumë vitesh duke hyrë në fushë, ende ndihem sikur është hera e parë”, tha ai.
Sa i përket shifrës së 1000 golave, Ronaldo pranoi se është një objektiv i rëndësishëm, por nuk dëshiron që të shndërrohet në një obsesion. Ai zbuloi gjithashtu se pas Kupës së Botës kishte menduar seriozisht për tërheqjen nga kombëtarja, por pas bisedave me drejtuesit vendosi të vazhdojë. Tani, Ronaldo vazhdon të jetë pjesë e Portugalisë, me dy objektiva të qarta përpara; 1000 gola dhe një tjetër trofe me kombëtaren.