Edicioni i pestë i “Big Brother VIP Albania” ka nisur me shumë emocion dhe pritshmëri për surpriza të reja, por gjithashtu ka sjellë një lajm të trishtë për publikun shqiptar.
Shpat Kasapi, këngëtari i njohur dhe i dashur për shumë fansa, ishte një nga emrat që do të bëhej pjesë e këtij edicioni. Fatkeqësisht, ai humbi jetën pak ditë më parë, duke tronditur të gjithë ata që e njohën dhe e adhuruan.
Moderatori Ledion Liço dhe “Big Brother VIP” mbajtën mbrëmë një homazh për artistin që do t’i mungojë shqiptarëve.
“Do të doja që sot të isha duke prezantuar klipin e tij hyrës. Do të prezantoja dhe tregonim shembullin që ai donte të tregonte për të birin. Kërkoj një duartrokitje. Lamtumirë artist!”, tha Ledion Liço.
Lajmi i humbjes së Shpatit ka trishtuar jo vetëm fansat e tij, por gjithashtu ka shkaktuar një valë ngushëllimesh nga kolegët dhe miqtë e tij në industrinë e muzikës. Shpat Kasapi do të kujtohet si një artist i pasionuar dhe një njeri me zemër të madhe, i cili ka dhënë shumë për muzikën dhe për publikun shqiptar.