Marrëdhënia e tensionuar me vjehrrën është pothuajse universale. Nga klishetë e filmave te debatet në rrjetet sociale dhe bisedat private mes çifteve, ky konflikt duket se prek të gjithë, madje edhe personazhet e famshëm.

Fundjavën e kaluar, Brooklyn Beckham e bëri publike një përçarje të gjatë familjare, duke zbuluar tensione serioze mes bashkëshortes së tij, Nicola Peltz Beckham, dhe prindërve të tij, Victoria dhe David Beckham.

Përmes disa postimeve në Instagram, ai pretendoi se Nicola ishte trajtuar vazhdimisht me mungesë respekti nga familja e tij.

Gruaja ime është përçmuar vazhdimisht nga familja ime, pavarësisht përpjekjeve tona për të qëndruar të bashkuar

-shkroi Brooklyn, duke përmendur episode si përjashtimi i saj nga takime familjare, kushte për takime pa praninë e saj dhe ndërhyrje gjatë vallëzimit të parë të çiftit në dasmë.

Edhe pse jo çdo konflikt me vjehrrën është kaq publik apo dramatik, përvoja e tensioneve, komenteve pasive-agresive, këshillave të padëshiruara apo përplasjeve të karakterit është shumë e zakonshme për çiftet.

Sipas terapistes së çifteve Lisa Chen, ky fenomen shpesh lidhet me atë që ajo e quan “konflikt besnikërie”.

Kur një partner krijon një familje të re, disa prindër e kanë të vështirë të pranojnë humbjen e ndikimit dhe kontrollit që kanë pasur më parë

-shpjegon ajo.

Si të përballeni me një marrëdhënie të vështirë me vjehrrën?

Ekspertët e marrëdhënieve familjare bien dakord se çelësi nuk është përballja agresive, por menaxhimi i zgjuar i situatës, me fokus te ruajtja e lidhjes në çift.

Ja disa këshilla praktike që mund të ndihmojnë:

Vendosni kufij bashkë me partnerin që në fillim

Para se të reagoni ndaj vjehrrës, flisni hapur me partnerin. Vendosni bashkë kufij të qartë: sa shpesh do të bëni vizita, sa kohë do të qëndroni në takime familjare dhe cilat tema nuk duhet të diskutohen (financat, fëmijët, jeta personale). Një qëndrim i përbashkët ju bën më të fortë si çift.

Zgjidhni betejat tuaja

Jo çdo koment apo sjellje kërkon reagim. Fokusohuni te sjelljet e përsëritura ose ato që kalojnë kufijtë. Ndonjëherë, injorimi, ndryshimi i temës ose largimi nga situata është mënyra më e shëndetshme për të ruajtur qetësinë.

Synoni korrektësi, jo domosdoshmërisht afërsi

Nuk është e nevojshme të keni një marrëdhënie të ngushtë me vjehrrën. Një raport korrekt, i sjellshëm dhe funksional është i mjaftueshëm. Ulni pritshmëritë dhe shmangni ndarjen e detajeve personale.

Hiqni dorë nga dëshira për ta ndryshuar

Përpjekja për ta “rregulluar” vjehrrën zakonisht sjell zhgënjim. Në vend të kësaj, fokusohuni në vendosjen e kufijve dhe në mbrojtjen e mirëqenies suaj emocionale. Qëndrimet e qarta dhe të shkurtra janë më efektive se debatet e gjata.

Merrni kohë për t’u çlodhur pas takimeve familjare

Takimet me persona kritikë ose stresues mund të jenë rraskapitëse. Planifikoni kohë për veten dhe për partnerin pas tyre, në mënyrë që tensionet të mos ndikojnë negativisht në marrëdhënien tuaj.