Një grua nga Irlanda ka fituar rreth 23 mijë paund dëmshpërblim pasi shefi i saj e tallte vazhdimisht në vendin e punës duke i thënë patate dhe duke përdorur shprehje fyese për origjinën e saj. Bernadette Hayes, e cila punonte në kompaninë e inxhinierisë West Leeds Civils në Leeds, iu drejtua gjykatës së punësimit duke pretenduar se ishte viktimë e talljeve dhe ngacmimeve për një periudhë prej rreth gjashtë muajsh.
Sipas dëshmisë së saj, drejtori i kompanisë Mick Atkins e thërriste shpesh patate sa herë që ajo hynte në zyrë dhe përdorte edhe terma të tjerë fyese që lidhen me stereotipe ndaj irlandezëve. Hayes deklaroi në gjykatë se komentet e vazhdueshme e bënin të ndihej e turpëruar, e pasigurt dhe shumë e shqetësuar, duke e krahasuar situatën me vdekje nga një mijë plagë të vogla.
Ajo tha se kishte frikë t’i kërkonte shefit të ndalonte, pasi kishte nevojë për punën dhe kishte frikë se mund ta humbiste vendin e punës. Gjykata vendosi në favor të saj për ngacmim me bazë racore dhe viktimizim, duke i akorduar 23 526 paund kompensim. Shuma përfshin rreth 13 mijë paund për dëmtim emocional dhe mbi 6 mijë paund për humbje të të ardhurave.
Gjykatësi theksoi se përdorimi i vazhdueshëm i termave si patate krijon një mjedis armiqësor dhe poshtërues për një person me origjinë irlandeze. Nga ana e tij, drejtori i kompanisë i cilësoi procedurat gjyqësore si të pakuptimta, duke kundërshtuar vendimin e tribunalit.