Detaje të reja tronditëse janë bërë publike lidhur me vrasjen e ish-finalistes së “Miss Zvicra”, Kristina Joksimovic, një ngjarje që ka shokuar opinionin publik në Zvicër.
Sipas mediave zvicerane, bashkëshorti i saj, 41-vjeçari Marc Rieben, akuzohet se ka vrarë 38-vjeçaren pas një konflikti të ashpër familjar, i lidhur me divorcin, kujdestarinë e fëmijëve dhe çështje financiare.
Hetimet tregojnë se ngjarja ka ndodhur në shkurt të vitit 2022, në Binningen pranë Bazelit. Prokuroria dyshon se gjatë përplasjes, i akuzuari e ka kapur viktimën nga fyti dhe e ka përplasur në mur, përpara se ta mbyste.
Më pas, sipas dosjes hetimore, ai dyshohet se ka tentuar të fshehë krimin duke copëtuar trupin e saj me mjete prerëse dhe pajisje të ndryshme shtëpiake. Autoritetet zvicerane raportojnë gjithashtu se janë gjetur prova që tregojnë për përpjekje për zhdukjen e gjurmëve, përfshirë përdorimin e një blenderi industrial dhe substancave kimike.
Raporti mjeko-ligjor ka rrëzuar pretendimet e të dyshuarit për vetëmbrojtje, duke konfirmuar se shkaku i vdekjes ka qenë mbytja. Prokurorët e kanë përshkruar sjelljen e tij pas ngjarjes si të ftohtë dhe pa shenja pendese, ndërsa janë evidentuar edhe dyshime për probleme të shëndetit mendor.
Trupi i viktimës u gjet më vonë nga familjarët në ambientet e lavanderisë së banesës, ku policia sekuestroi edhe prova materiale që lidhen me krimin. Ngjarja është konsideruar si një nga rastet më të rënda kriminale të viteve të fundit në Zvicër.
Kristina Joksimovic kishte marrë pjesë në “Miss Zvicra” në vitin 2007 dhe më pas ishte angazhuar si trajnere në fushën e modelimit.