Aktorja e njohur britanike, Kate Beckinsale, ka ngritur akuza të forta ndaj industrisë së Hollywood-it, duke pretenduar se është pushuar nga agjentja e saj pasi kishte pëlqyer një postim për armëpushim në Gaza.
Deklaratat e saj erdhën në komentet e një postimi të Mark Ruffalo, i cili po promovonte filmin “Palestina 36”. Beckinsale e kritikoi hapur aktorin, duke thënë se ai nuk i ishte përgjigjur kur ajo u përpoq ta kontaktonte pas pushimit nga puna.
“Duhet të jetë bukur kur agjenti nuk të pushon sepse ke pëlqyer një postim për armëpushim”, shkroi ajo, duke nënkuptuar një standard të dyfishtë në industri.
Aktorja shkoi edhe më tej, duke e lidhur situatën me pabarazinë gjinore në Hollywood.
Sipas saj, fakti që ajo u pushua ndërsa Ruffalo jo, tregon një privilegj të dukshëm për burrat në këtë industri.
Në reagimin e saj, Beckinsale përmendi edhe rastin e Susan Sarandon, e cila më herët ka deklaruar se është vendosur në “listë të zezë” për shkak të qëndrimeve të saj publike.
Ajo zbuloi gjithashtu se në momentin kur ndodhi pushimi, po kalonte një periudhë shumë të vështirë personale. Sipas saj, nëna e saj, Judy Loe, ishte diagnostikuar me tumor në tru dhe kishte pak kohë për të jetuar, ndërsa njerku i saj, Roy Battersby, po përballej me probleme të rënda shëndetësore që më pas çuan në vdekjen e tij.
“Po përgatitesha të fluturoja për në Angli për t’u kujdesur për të dhe mora pushimin nga puna me dy fjali”, shkroi ajo, duke theksuar se kjo ndodhi pas 12 vitesh bashkëpunimi me agjenten e saj.
Megjithatë, Beckinsale theksoi se nuk e fajëson personalisht Ruffalon, edhe pse u ndje e injoruar. Ajo e përshkroi këtë si një shembull të “privilegjit mashkullor”, që sipas saj ekziston edhe tek njerëz që konsiderohen “të mirë”.
Deklaratat e saj kanë hapur një debat të ri mbi lirinë e shprehjes, ndikimin e qëndrimeve politike në karrierë dhe standardet e dyfishta brenda industrisë së filmit.
