Michelle Jamileth Macías Peñarrieta, e njohur në TikTok si Queen Michelle, u arrestua në Kolumbi bashkë me nënën e saj, në kuadër të një hetimi për pastrim parash që lidhet me organizatën kriminale të drejtuar nga babai i saj. Michelle është vajza e José Adolfo Macías Villamar, i njohur si Fito, kreu i bandës ekuadoriane Los Choneros, i cili po vuan një dënim me 34 vjet burg për trafik droge dhe vrasje.
Influencuesja, e cila kishte 65 milionë ndjekës, publikonte video ku këndonte dhe kërcente, por edhe pamje të një jete luksoze. Sipas raportimeve, në llogaritë e lidhura me të shfaqeshin tufa me kartëmonedha, automjete të shtrenjta dhe produkte luksi. Ajo kishte nisur gjithashtu një karrierë muzikore dhe ishte shfaqur në këngë kushtuar të atit.
Policia kolumbiane arrestoi Michelle dhe nënën e saj, Inda Mariela Peñarrieta Tuárez, më 27 shtator në Sabana de Torres. Sipas Associated Press, operacioni u mbështet nga FBI-ja dhe autoritetet ekuadoriane. Dy gratë u dëbuan më pas nga Kolumbia dhe u kthyen në Ekuador, duke mbërritur në Guayaquil më 29 shtator. Pas arrestimit, llogaritë e Queen Michelle në rrjetet sociale u mbyllën.
Hetuesit dyshojnë se nënë e bijë ishin të lidhura me një strukturë që përdorte kompani guaskë për pastrimin e parave të lidhura me Los Choneros. Autoritetet kanë identifikuar rreth 435,900 dollarë transaksione financiare në llogaritë e Michelle. Në llogaritë e nënës së saj janë konstatuar gjithashtu rreth 1.3 milionë dollarë të ardhura të pazakonta dhe të pajustifikuara gjatë periudhës 2020–2024. Hetimi më i gjerë lidhet me më shumë se 25 milionë dollarë që dyshohet se janë siguruar përmes aktiviteteve të paligjshme.