E dashura e Liam Payne, Kate Cassidy, teksa është shfaqur në intervistën e saj të parë që pas vdekjes së këngëtarit, është shprehur se ende po lufton për të pranuar vdekjen e tij.
“Daily Mail” shkruan se modelja me lot në sy i tha moderatores se ka ende ditë më të vështira për të përballuar dhe se ajo i referohet Liam në kohën e tashme, pasi nuk e pranon dot që ai nuk jeton më.
“Unë e gjej veten duke folur për të kaq shumë në kohën e tashme. Nuk e ndjej nevojën të korrigjoj veten. Kjo është pjesë e rrugëtimit tim të shërimit. Unë jam ende duke punuar për të pranuar se ai nuk është më këtu”, u shpreh Kate teksa shtoi: “Është vërtet e vështirë të pranohet. Nuk e kisha menduar kurrë se do të flisja për të në kohën e shkuar”.
Kate tha se familja dhe miqtë e saj kishin qenë një rrjet jetik mbështetës për të në muajt që kur Liam u gjet i vdekur pasi u rrëzua nga një ballkoni i katit të tretë në hotelin Casa Sur Palermo në Buenos Aires më 16 tetor.
“Po përpiqem të bëj më të mirën time. Po kaloj ditë të vështira, por jam e rrethuar nga një sistem kaq i madh mbështetjeje dhe kjo më ka ndihmuar shumë, të gjithë miqtë dhe familja ime janë mbështetës dhe më ndihmojnë të jem produktive,” tha ajo.
