Një festë e zakonshme ditëlindjeje është kthyer në një makth të vërtetë për një studente juridiku në Britani, pasi ajo përfundoi e verbër dhe e paaftë për të lëvizur pasi u infektua me meningjit gjatë një nate në klub. E reja, 21 vjeçare, u rrëzua në banesën e saj pasi ishte kthyer nga një mbrëmje në një klub nate në Canterbury, i cili dyshohet se është epiqendra e shpërthimit të infeksionit. Miqtë e saj ndërhynë me shpejtësi dhe e transportuan drejt spitalit, duke i shpëtuar jetën në momentet e fundit.
Rasti i saj është vetëm një nga të paktën 15 persona të prekur nga ky bakter i rrezikshëm, ndërsa dy viktima kanë humbur jetën. Një foshnjë vetëm 9 muajshe ndodhet në terapi intensive dhe mjekët paralajmërojnë për pasoja afatgjata.
Autoritetet shëndetësore britanike e kanë cilësuar situatën si të paprecedentë, me një përhapje të shpejtë që ka shkaktuar panik mes studentëve. Universitetet kanë anuluar provimet fizike, ndërsa qindra të rinj janë në radhë për antibiotikë dhe vaksina.
Dyshohet se përhapja është ndihmuar nga kontaktet e afërta në ambiente të mbipopulluara, si ndarja e pijeve apo përdorimi i përbashkët i cigareve elektronike. Madje, disa studentë e krahasojnë situatën me një valë të re pandemie.
Simptomat e meningjitit mund të shfaqen brenda disa ditësh dhe përkeqësohen me shpejtësi, duke përfshirë temperaturë të lartë, ndjeshmëri ndaj dritës dhe ngurtësim të qafës. Në rastin e studentes, gjendja e saj u përkeqësua brenda orësh, duke çuar në humbje të përkohshme të shikimit.