Një debat i fortë ka nisur në rrjet lidhur me një moment nga ceremonia zyrtare në Windsor Castle. Princi William u pa duke u ulur në gjunjë për të folur në nivelin e aktorit të njohur, Warwick Davis.
Mediat e huaja shkruajnë se Princi i Uellsit i dorëzoi Davis titullin Officer of the Order of the British Empire (OBE), duke e nderuar për kontributin e tij në art dhe në bamirësi, veçanërisht për themelimin e organizatës Little People UK që mbështet personat me nanizëm dhe familjet e tyre.
Megjithatë, gjesti i William, që synonte të krijonte kontakt të drejtpërdrejtë dhe respektues, u interpretua ndryshe nga publiku. Disa e vlerësuan si një veprim të ndjeshëm dhe të kujdesshëm, ndërsa të tjerë ngritën pikëpyetje nëse ishte mënyra e duhur për të trajtuar dallimet fizike.
Debati u intensifikua pasi aktivistja për të drejtat e personave me aftësi të kufizuara, Milly Pickles, publikoi një sondazh në rrjetet sociale, ku rezultatet treguan një ndarje të qartë mes mendimeve të personave me dhe pa aftësi të kufizuara.
Ngjarja ka hapur një diskutim më të gjerë mbi mënyrën se si duhet të ndërveprohet me respekt dhe ndjeshmëri në situata të tilla, duke theksuar se perceptimet mund të ndryshojnë në varësi të përvojave personale.
