Princi Harry dhe Meghan Markle janë befasuar nga një letër e dërguar në emër të Mbretit Charles, e cila sqaron se çifti vazhdon të ketë statusin e anëtarëve joaktivë të familjes mbretërore.
Sipas zëdhënësit të tyre, Harry dhe Meghan “ishin disi të befasuar” që nuk ishin informuar paraprakisht për letrën, ndërsa burime pranë familjes mbretërore pretendojnë se ata ishin njoftuar përpara publikimit.
Letra thekson se çifti nuk mund të përdorë titujt “Lartësia e Tij Mbretërore” dhe “Lartësia e Saj Mbretërore” dhe se çdo angazhim i tyre do të zhvillohet në kapacitet privat, pa përfaqësuar Familjen Mbretërore.
Mesazhi rikujton gjithashtu marrëveshjen e vitit 2020, sipas së cilës Harry dhe Meghan hoqën dorë nga detyrat zyrtare mbretërore dhe nuk janë më anëtarë aktivë të familjes.
Ndërkohë, një komitet qeveritar pritet të shqyrtojë nivelin e sigurisë së financuar nga taksapaguesit që do t’u ofrohet çiftit, tashmë që ata janë rikthyer si rezidentë në Mbretërinë e Bashkuar.