Dokumentari shqetësues i Netflix-it, “Evil Influencer: The Jodi Hildebrandt Story”, ka arritur shikueshmëri rekord që nga publikimi i tij më 30 dhjetor 2025, duke grumbulluar rreth 15 milionë shikime në ditët e para dhe duke u renditur në krye të listës globale të Netflix. Produkti ekspozon historinë e Jodi Hildebrandt, një ish-terapiste dhe trajnere jete, e cila përmes markës së saj “ConneXions” ndërtoi autoritet në mediat sociale dhe u jepte këshilla mijëra prindërve mbi disiplinën dhe jetesën morale.
Dokumentari tregon sesi Hildebrandt përdori gjuhën e vetëndihmës dhe të fesë për të fituar besimin, manipuloi psikologjikisht ndjekësit dhe klientët, dhe bashkëpunoi me YouTuber-en e njohur Ruby Franke, duke çuar idetë e tyre për disiplinën e rreptë deri në abuzim të rëndë me fëmijët. Rasti doli në dritë në vitin 2023, kur një nga fëmijët e Franke arratisi nga shtëpia e Hildebrandt për të kërkuar ndihmë, duke zbuluar një ambient të kequshqyer, frikësues dhe të lënë pas dore fizikisht, me litarë, pranga dhe sende të tjera që tregonin abuzim sistemik.
Në shkurt të vitit 2024, të dyja gratë u dënuan me katër dënime të ndryshme burgimi, secila nga një deri në 15 vjet, përkatësisht për katër akuza. Gazeta “The Guardian” i ka dhënë dokumentarit tre nga pesë yje, duke e përshkruar si një përshkrim të llahtarshëm dhe të vrazhdë, por gjithashtu duke vënë në dyshim etikën e shikimit të një subjekti të tillë në formatin e krimit të vërtetë.
Shumë komentues në mediat sociale kanë theksuar se historia është emocionalisht e vështirë dhe pasojat brutale të abuzimit janë të vështira për t’u parë. Dokumentari përdor pamje arkivore nga YouTube, rrjetet sociale, dëshmi të ish-ndjekësve dhe familjarëve, dokumente policore dhe gjyqësore, duke krijuar një portret të frikshëm të asaj që ndodh pas maskës së influencuesit të famshëm online. Ky dokumentar jo vetëm që ka ngritur debat mbi fuqinë e mediave sociale dhe ndikimin e influencuesve, por po shërben edhe si paralajmërim për rreziqet e fshehura pas autoritetit virtual.