Një aksident tragjik i ka marrë jetën influencueses, Aline Cristina Dalmolin, 41 vjeçe, në qytetin Balneário Camboriú të Brazilit. Ajo ishte pasagjere në një automjet Porsche Macan, i cili u përplas me forcë në një shtyllë, duke shkaktuar dëmtime fatale.
Sipas autoriteteve, përplasja ishte aq e fortë sa Dalmolin pësoi dëmtime shumë të rënda trupore dhe në kokë. Ajo ndërroi jetë në ambulancë, gjatë rrugës për në spital, pasi pësoi disa arreste kardiake dhe mjekët nuk arritën ta shpëtonin. Shoferi 57 vjeç, i cili dyshohet se ishte nën ndikimin e alkoolit, u largua nga vendi i aksidentit pa pësuar lëndime.
Policia bëri të ditur se ai u gjet më vonë në një zonë kënetore pranë lumit Camboriú, ku shfaqte shenja të qarta dehjeje, si të folur të paqartë, vështirësi në ecje dhe dezorientim. Ai është arrestuar dhe akuzohet për vrasje nga pakujdesia gjatë drejtimit të mjetit në gjendje të dehur.
Marrëdhënia mes shoferit dhe viktimës mbetet ende e paqartë, ndërsa hetimet vijojnë për të zbardhur plotësisht rrethanat e ngjarjes. Aline kishte publikuar pak para vdekjes një mesazh reflektues për jetën dhe të ardhmen, ku shkruante se viti 2026 fillon tani.