Jeremy Meeks, i cilësuar shpesh si “krimineli më seksi në botë”, ka treguar për herë të parë sfidat që përjetoi gjatë kohës në burg. Historia e tij mori vëmendje globale në vitin 2014, kur fotografia e arrestimit në Stockton, Kaliforni u përhap me shpejtësi në internet, duke e kthyer në një fenomen viral. Por pas këtij popullariteti fshihej një realitet më i vështirë.
Në një intervistë për “Inside True Crime”, Meeks tregoi se interesimi i madh i publikut ndikoi drejtpërdrejt në jetën e tij pas hekurave. Sipas tij, shumë persona të panjohur shkonin në burg për ta vizituar, duke zënë vendet e kufizuara dhe duke pamundësuar takimet me familjarët, përfshirë edhe djalin e tij të vogël.
Ai kujtoi se në atë kohë djali ishte vetëm pesë vjeç dhe nuk arrinte të kuptonte mungesën e të atit, ndërsa vetë Meeks kërkonte nga fansat të ndalonin vizitat e shpeshta. Ndërkohë, ai nisi të kuptonte përmasat e famës përmes letrave që merrte çdo ditë nga e gjithë bota, të cilat sipas tij arrinin deri në 300 në ditë.
Fama solli edhe tensione të tjera brenda institucionit, përfshirë përplasje me rojet dhe situata të tensionuara gjatë paraqitjeve në gjykatë, ku prania e mediave ishte e madhe. Ai ka pretenduar gjithashtu se ka përjetuar dhunë nga oficerët e burgut, ndërsa theksoi se nuk pati konflikte me të burgosurit e tjerë.
I dënuar për armëmbajtje pa leje dhe lidhje me bandën Crips, Meeks qëndroi rreth një vit në burg dhe u lirua në vitin 2016. Pas daljes, ai arriti të shfrytëzojë famën e krijuar, duke ndërtuar një karrierë të suksesshme në botën e modelingut.
