Komiteti Olimpik Ndërkombëtar ka vendosur të ndalojë pjesëmarrjen e atletëve transgjinorë në garat e femrave në Lojërat Olimpike, një vendim që pritet të ndikojë ndjeshëm në sportin ndërkombëtar. Sipas rregullave të reja, që do të zbatohen nga Olimpiada e Los Angeles 2028, garat në kategorinë e femrave do të jenë të kufizuara vetëm për femrat biologjike.
Presidentja e IOC, Kirsty Coventry, theksoi se ky vendim është bazuar në kërkime shkencore dhe këshilla të ekspertëve mjekësorë, duke synuar të ruajë drejtësinë dhe sigurinë në konkurrencë. Vendimi vjen pas debateve të shumta që kanë shoqëruar pjesëmarrjen e atletëve trans në sportet e femrave, veçanërisht pas polemikave në Lojërat Olimpike të Parisit 2024.
Rregullorja e re parashikon gjithashtu teste verifikimi për atletet, të cilat do të kryhen vetëm një herë gjatë jetës, për të përcaktuar kriteret biologjike të pjesëmarrjes. Ky ndryshim pritet të prekë disa sportistë të njohur ndërkombëtarisht dhe të ndezë debat të ri global mbi balancën mes përfshirjes dhe drejtësisë në sport.