Natë makthi për portierin e kombëtares italiane dhe të PSG-së, Gianluigi Donnarumma. Ky i fundit ka rënë viktimë e një grabitje teksa ndodhej në shtëpi me partneren e tij në Paris.
Sipas informacioneve nga faqja franceze “Actu17”, sulmi ndodhi natën mes të enjtes dhe të premtes. Nga detajet e deritanishme rezulton se Donnarumma dhe partnerja e tij ishin viktima të një grabitje dhe të dhunës, ku hajdutët u larguan me sende dhe vlerë monetare që kapnin shifrat e 500 mijë euro.
Ish-portieri i Milanit dhe partnerja e tij pasi janë lidhur nga grabitësit, arritën të liroheshin më pas dhe u strehuan në një hotel që ndodhet jo shumë larg shtëpisë së tyre rreth orës 3:20 të mëngjesit.
Stafi i hotelit ka lajmëruar më pas policinë dhe është kujdesur për çiftin, të cilët janë ende shumë të tronditur.
Sipas burimeve franceze, Donnarumma dhe e fejuara e tij, të dërguar në spital pas sulmit, u lidhën nga disa persona në banesën e tyre në lagjen e tetë të Parisit. Policia vendase tashmë është vënë në lëvizje për të gjetur autorët.