Modelja dhe prezantuesja amerikane, Jenny McCarthy, ka zbuluar se po kalon një periudhë të vështirë shëndetësore.
Në një intervistë për “People”, ajo ka treguar se është shëruar nga një infeksion i rëndë që i dëmtoi shumë nofullën dhe i shkaktoi rënien e dhëmbëve e implanteve dentare.
McCarthy tregoi se gjatë këtij viti i është dashur t’i nënshtrohet nëntë operacioneve për shkak të komplikacioneve të njëpasnjëshme.
“Pata një infeksion që u shndërrua në një tjetër e pastaj në një tjetër, dhe më pas filluan të më rriteshin sytë. Dhëmbët dhe implantet po më binin”, ka rrëfyer ajo, duke e përshkruar situatën si jashtëzakonisht traumatike.
Mjekët zbuluan se prezantuesja kishte një infeksion të thellë të kockave që i kishte dëmtuar nofullën, duke kërkuar trajtim afatgjatë.
“Kam marrë antibiotikë për një vit dhe ha vetëm ushqim të butë”, shtoi McCarthy.
Ajo tregon se dhimbjet kanë qenë të padurueshme dhe se infeksioni rikthehej vazhdimisht:
“Sa herë që mendonim se ishte zhdukur, kthehej përsëri. Ndjeja dhimbje të tmerrshme. Nofulla më fryhej dhe në të njëjtën kohë, më shfaqeshin rritje në sy. Njerëzit duhet të ndjejnë pak keqardhje për mua”.
Tani që gjendja e saj po përmirësohet, Jenny McCarthy shprehet se mezi pret të kalojë më shumë kohë me bashkëshortin e saj, aktorin dhe këngëtarin Donnie Wahlberg, me të cilin është e martuar që nga viti 2014.
