Anëtarët e Familjes Mbretërore britanike kanë një traditë të gjatë shërbimi në Forcat e Armatosura. Ndër ta, asnjë dislokim nuk është konsideruar më i rrezikshëm se ai i Princ Harry-t në Afganistan, kur ai ishte i treti në radhën e trashëgimisë së fronit. Në fund të vitit 2007, “Cornet Wales” mbërriti në Afganistan nën një embargo mediatike për sigurinë e tij. Ai u përshtat shpejt me jetën ushtarake, duke fituar respektin e shokëve. Pavarësisht kushteve të vështira në një zonë me aktivitet të lartë taleban.
Familja mbretërore e mbajti mungesën e tij në heshtje, ndërsa Mbretëresha në fjalimin e saj u lut për kthimin e sigurt të çdo ushtari. Kontakti me familjen dhe të dashurën e atëhershme, Chelsy Davy, mbahej nëpërmjet telefonatës javore dhe Facebook-ut me pseudonime. Por në fillim të vitit 2008, një revistë australiane zbuloi vendndodhjen e tij dhe lajmi u përhap globalisht pasi u publikua nga Drudge Report. Si pasojë, Harry u evakuua menjëherë, duke e mbyllur para kohe misionin. Ai u shpreh i zhgënjyer që nuk mund ta përfundonte detyrën me shokët e tij.
Për shërbimin e tij, mori Medaljen e Shërbimit Operacional për Afganistanin. Në 2012, u rikthye në vendin e konfliktit si “Captain Wales”, pilot i helikopterit Apache. Gjatë kësaj kohe, ai mori pjesë në mbi 100 misione, duke ofruar mbështetje luftarake dhe mbikëqyrje. Në kujtimet e tij Spare, Harry pranoi se gjatë kësaj kohe kishte vrarë 25 luftëtarë taleban. Ky rrëfim u bë hera e parë që ai specifikoi numrin e personave të vrarë në detyrë.