Një hetim i gjerë i autoriteteve italiane ka zbuluar një skemë të pazakontë komunikimi mes të burgosurve dhe bashkëpunëtorëve të tyre jashtë qelive. Sipas karabinierëve, karta SIM futeshin në burg përmes takimeve intime mes një të burgosuri të lidhur me klanin mafioz Strisciuglio dhe partneres së tij, duke mundësuar komunikime të paligjshme nga brenda institucionit penitenciar.
Operacioni i zhvilluar në provincën e Barit, si dhe në burgjet e Leçes dhe Paolës në Kozenca, çoi në arrestimin e katër personave. Dy prej tyre ndodheshin tashmë në paraburgim, një tjetër u dërgua në burg, ndërsa një i katërt u vendos në arrest shtëpiak.
Hetimet nisën pas një tentative vrasjeje në Palo del Colle dhe zbuluan një rrjet kërcënimesh, zhvatjesh dhe sulmesh të lidhura me krimin e organizuar. Sipas prokurorëve, një biznesmen lokal që merrej me dhënien e automjeteve me qira ishte detyruar t’u dorëzonte makinat anëtarëve të grupit kriminal pa marrë pagesë. Për të ushtruar presion, autorët dyshohet se dogjën një automjet dhe organizuan sulme të armatosura.
Mes akuzave që rëndojnë mbi të dyshuarit janë tentativa e vrasjes, zhvatja, posedimi i paligjshëm i armëve, vjedhja, djegia e automjeteve, përkrahja e autorëve të krimit dhe futja e paligjshme e pajisjeve të komunikimit në burg. Sipas hetuesve, ngjarjet lidhen me një seri episodesh kriminale të ndodhura mes viteve 2023 dhe 2024, të hetuara në kuadër të operacionit të koduar “Mbreti i Zi”, i cili synonte zbardhjen e një tentative vrasjeje të ndodhur në Palo del Colle.