Maluma ka ndarë një lajm të ëmbël me ndjekësit e tij, duke zbuluar se partnerja e tij, Susana Gomez, është shtatzënë me fëmijën e tyre të dytë.
Artisti kolumbian e bëri publik lajmin përmes një postimi emocionues në rrjetet sociale të dielën, më 10 maj, në të njëjtën ditë me festimin e Ditës së Nënës.
Në fotografinë bardh e zi të publikuar nga Maluma, ai shfaqet pranë vajzës së tyre, Paris, duke puthur barkun e rrumbullakosur të Susana Gomez. Postimi u shoqërua vetëm me një emoji zemre blu, duke emocionuar menjëherë fansat e çiftit.
Romanca mes dyshes nisi të përflitej në vitin 2020, kur ata u panë së bashku në publik, ndërsa më vonë vendosën ta konfirmonin lidhjen e tyre.
Në intervista të mëparshme, këngëtari kishte folur hapur për sfidat emocionale që përjetoi pas lindjes së vajzës së parë. Ai kishte treguar se ishte përballur me ankth dhe sulme paniku, duke kërkuar ndihmë profesionale dhe mbështetje nga familja.
Maluma ka theksuar se meditimi, disiplina dhe kujdesi për shëndetin mendor e ndihmuan të kalonte atë periudhë të vështirë dhe të gjente ekuilibër në jetën personale.
Sot, artisti shprehet se po jeton një nga momentet më të lumtura të jetës së tij, i rrethuar nga familja dhe dashuria e tyre.