Një startup i Inteligjencës Artificiale me kulturë pune jo konvencionale dhe themelues shumë të rinj po tërheq vëmendjen në industrinë tech. Aaru ka arritur së fundmi një vlerësim prej 1 miliard dollarësh, duke hyrë në radhën e “unicorn”-eve të rinj që po sfidojnë mënyrat tradicionale të biznesit dhe kërkimit të tregut.
Kompania u themelua vetëm dy vite më parë nga Cameron Fink dhe Ned Koh, atëherë përkatësisht 18 dhe 19 vjeç, së bashku me drejtuesin e teknologjisë John Kessler, i cili në atë kohë ishte vetëm 15 vjeç. Për shkak të moshës, Kessler nuk është ende pjesë e bordit drejtues dhe dokumentacioni i investimeve është firmosur nga prindi i tij.
Selia e parë e kompanisë në New York City pasqyronte një ambient që kombinonte elementë të një laboratori teknologjik me ato të një shtëpie studentore, përfshirë një kosh basketbolli dhe një “dhomë shfryrjeje” ku punonjësit mund të thyenin mobilje pas dështimeve në kodim.
Modeli i biznesit të Aaru synon të transformojë kërkimin e tregut. Në vend që kompanitë të paguajnë njerëz për sondazhe apo fokus-grupe, platforma përdor mijëra agjentë të AI për të simuluar reagime njerëzore. Duke ushqyer sistemin me të dhëna demografike dhe psikografike, krijohen profile virtuale që mund të përdoren për zhvillim produkti, strategji çmimesh, identifikim klientësh të rinj dhe madje edhe sondazhe politike.
Kompania ka kryer teste dhe projekte për marka të mëdha si McDonald’s, Boston Beer Company dhe studioja filmike A24. Aktualisht, ajo po bashkëpunon edhe me Bayer për testimin e mesazheve kreative dhe sloganeve për produkte të ndryshme farmaceutike.
