Një banor në qytetin e Hueskës në Spanjë është detyruar të paguajë 14.506 euro dëmshpërblim, pasi lejoi që dhjetëra pëllumba të ndërtonin fole në ballkonin e banesës së tij, duke shkaktuar probleme serioze higjienike për fqinjët.
Sipas mediave spanjolle, pronari kishte braktisur banesën dhe nuk kishte marrë asnjë masë për pastrimin apo mirëmbajtjen e saj. Me kalimin e kohës, ballkoni u mbush me pëllumba, jashtëqitje dhe papastërti, duke krijuar shqetësime të vazhdueshme për banorët e tjerë të pallatit.
Ankesat e fqinjëve lidhen jo vetëm me ndotjen dhe erën e rëndë, por edhe me pasoja shëndetësore. Disa prej tyre raportuan probleme dermatologjike të shkaktuara nga marimangat e lidhura me praninë e shpendëve, duke pësuar irritime dhe urtikarie në duar e këmbë.
Pasi pronari nuk reagoi ndaj kërkesave të përsëritura, ndërhyri bashkia, e cila dërgoi punonjës për pastrimin e zonës. Më pas, banorët vendosën ta çonin çështjen në gjykatë.
Gjykata Provinciale e Hueskës vendosi pjesërisht në favor të paditësve dhe urdhëroi pronarin të paguajë 14.506 euro për dëmet e shkaktuara. Po ashtu, ai është detyruar të mbajë ballkonin në kushte të përshtatshme higjienike dhe të marrë masa për të parandaluar rikthimin e pëllumbave.
Sipas vendimit, problemi zgjati rreth 16 muaj dhe u konsiderua pasojë e mosveprimit të pronarit, i cili nuk mori masat e nevojshme për të shmangur krijimin e kushteve të pashëndetshme për komunitetin.