Një specie e re bimore e zbuluar në Andet peruane ka marrë emrin e yllit argjentinas të futbollit, Lionel Messi. E pagëzuar si Salvia messii, bima ka tërhequr vëmendjen e studiuesve për lulet e saj në nuanca blu të çelët dhe të bardhë, të cilat ngjajnë me ngjyrat e fanellës së kombëtares së Argjentinës. Zbulimi është dokumentuar në një studim të botuar së fundmi në revistën ndërkombëtare shkencore të botanikës Phytotaxa. Punimi është realizuar nga botanistët peruanë Paul Gonzales dhe Jean Capcha-Ramos, në bashkëpunim me studiuesin argjentinas Rolando Uria.
Specia e re i përket familjes Lamiaceae, ku bëjnë pjesë edhe nenexhiku dhe sherbela. Ajo rritet në formën e një shkurreje aromatike, e cila mund të arrijë deri në 1.5 metra lartësi. Salvia messii gjendet në zona shkëmbore dhe me shkurre në pjesët qendrore dhe jugore të Andeve peruane, në lartësi nga 2,000 deri në 2,400 metra mbi nivelin e detit. Ngjyrat e luleve të saj, blu e bardhë, janë elementi që e lidh drejtpërdrejt me kombëtaren argjentinase, fanellën e së cilës Messi e ka veshur përgjatë karrierës së tij ndërkombëtare.
Megjithatë, përtej veçantisë së emrit, zbulimi ka ngritur shqetësime për mbijetesën e kësaj bime. Për shkak se përhapet vetëm në një territor të kufizuar gjeografik, studiuesit e kanë klasifikuar specien si të rrezikuar. Sipas kërkuesve, ky zbulim nxjerr në pah edhe rëndësinë e ekosistemeve malore të Andeve, veçanërisht zonave me shkurre që rrethojnë pyjet e mbetura në pjesën perëndimore të këtij vargmali.
Këto habitate përfaqësojnë një qendër të rëndësishme të biodiversitetit bimor, por ende nuk kanë marrë vëmendjen e duhur nga komuniteti shkencor. Identifikimi i Salvia messii tregon se në këto zona mund të gjenden ende specie të veçanta bimore, për të cilat njohuritë shkencore mbeten të kufizuara. Në të njëjtën kohë, përhapja e ngushtë e bimës nënvizon nevojën për vëmendje më të madhe ndaj habitateve ku ajo rritet, për të mbrojtur biodiversitetin e tyre.