Një lajm i bukur për adhuruesit e muzikës latine: Maluma pritet të vijë në Kosovë gjatë vitit 2027. Këngëtari kolumbian ka përfshirë Prishtinën në itinerarin e turneut të tij të ardhshëm, duke ngjallur menjëherë entuziazëm te fansat shqiptarë.
Përmes një postimi në Instagram, artisti ka bërë publike qytetet që do të vizitojë me “Loco X Volver World Tour 2027”. Lista përfshin më shumë se 60 destinacione ndërkombëtare, mes tyre edhe disa prej kryeqyteteve dhe qendrave më të njohura të muzikës, si Parisi, Madridi, Berlini, Milano dhe Los Angeles.
Prania e Prishtinës në këtë listë e bën ndalesën në Kosovë një nga momentet më të pritshme për publikun shqiptar. Ajo që mbetet ende mister është mënyra se si do të organizohet koncerti. Nuk ka ende një konfirmim nëse Maluma do të ngjitet në skenën e festivalit Sunny Hill apo nëse do të vijë për një koncert të dedikuar. Po ashtu, detajet mbi datën, vendndodhjen dhe biletat nuk janë bërë ende publike. Deri atëherë, fansave u mbetet të presin për njoftimin zyrtar.