Presidenti Volodymyr Zelensky ka falënderuar Mila Kunis dhe Ashton Kutcher, pasi arritën që të mblidhnin rreth 35 milionë dollarë për të mbështetur refugjatët që po largohen nga Ukraina e shkatërruar nga lufta.
Të dielën, presidenti 44-vjeçar ka patur një video-telefonatë me çiftin e famshëm, për të diskutuar punën e tyre. Ndërkohë numri i refugjatëve ukrainas u rrit në 3.2 milionë, sipas të dhënave të fundit të Kombeve të Bashkuara.
Kujtojmë se Kutcher 44 vjeç dhe Kunis, 38 vjeçe, e cila ka lindur në Chernivtsi të Ukrainës, nisën më 3 mars një “GoFundMe” për të financuar kompanitë me bazë në San Francisco Flexport dhe Airbnb.
Flexport është një kompani transporti mallrash që sjell furnizime për refugjatët në të gjithë Evrpoën dhe Airbnb po u siguron atyre strehim falas dhe afatshkurtër.
Nga ana tjetër, presidenti ukrainas shkroi në “Twitter” fjalë falënderuese për çiftin. Zelensku shprehej se ata ishin “ndër të parët që iu përgjigjen pikëllimit tonë”.
“Ata kanë mbledhur tashmë 35 milionë dollarë dhe po i dërgojnë ato në @flexport & @Airbnb, për të ndihmuar refugjatët ukrainas. Mirënjohës për mbështetjen e tyre. Të impresionuar nga vendosmëria e tyre. Ata frymëzojnë botën”, shton presidenti i Ukrainës.