Dy skiatorë gjermanë i shpëtuan për mrekulli një situate ekstreme në veri të Evropës, pasi përdorën copa akulli për të formuar një mesazh SOS që u pa nga ekipet e shpëtimit. Çifti ishte duke kaluar me ski një zonë të ngrirë të Gjirit Bothnian, mes Finlandës dhe Suedisë, kur gjatë natës akulli u ça papritur poshtë tyre. Pothuajse të gjitha pajisjet e tyre ranë në ujërat e ftohta subarktike.
Ata arritën të zhvendoseshin në një pjesë më të qëndrueshme të akullit dhe dërguan sinjal emergjence me radio, ndërsa përdorën copa akulli për të krijuar një sinjal vizual SOS për ekipet e kërkim-shpëtimit. Operacioni u zhvillua në kushte shumë të vështira moti, me përfshirjen e avionëve nga Finlanda dhe Suedia. Pas disa orësh kërkimi, ekipet arritën t’i lokalizojnë dhe t’i shpëtojnë rreth mesditës.
Sipas autoriteteve, dy turistët ishin të ftohur, por në gjendje të mirë shëndetësore. Ata kishin kaluar një natë në akull edhe para incidentit, ndërsa po tentonin të përshkonin një distancë të gjatë mbi detin e ngrirë.