Ish-presidenti legjendar dhe një nga figurat më të rëndësishme në historinë e automobilizmit, Bernie Ecclestone, ka festuar 95 vjetorin e lindjes.
Pavarësisht pasurisë së tij të jashtëzakonshme, që vlerësohet në rreth 4 miliardë dollarë, Ecclestone jeton sot një jetë të qetë e modeste në Gstaad të Zvicrës, pranë bashkëshortes 49-vjeçare, Fabiana dhe djalit të tyre 5-vjeçar, Ace.
Një jetë mes pistave dhe familjes
Edhe pse prej vitit 2017 nuk mban më rolin e CEO-s së Formula 1, 95-vjeçari vijon të jetë i pranishëm në garat më të rëndësishme të botës si president emeritus. Trashëgimia e tij mbetet thelbësore për sportin që e transformoi në një biznes global.
Në jetën private, Ecclestone dhe Fabiana tregojnë se janë përqendruar plotësisht në familje dhe në edukimin e djalit të tyre të vogël.
“Bernie dhe unë jemi një ekip. Ai ka një qetësi të jashtëzakonshme me Ace, sidomos kur unë humbas durimin”, rrëfen Fabiana. Çifti ndan kohën mes Zvicrës dhe Brazilit, duke mbajtur një stil jete larg bujës së dikurshme.
Pasuria e madhe dhe dëshira për thjeshtësi
Afër një shekulli jetë, Ecclestone po tregon se thjeshtësia është luksi më i madh se pasuria. Së fundmi, 95-vjeçari është ndarë nga një pjesë e madhe e koleksioneve dhe pronave të tij, për të thjeshtuar përditshmërinë.
Në fillim të vitit, ai shiti koleksionin e tij personal prej 69 makinash Formula 1, që kap një vlerë rreth 500 milionë paundë, te trashëgimtari i Red Bull-it, Mark Mateschitz.
Sipas mediave gjermane, Ecclestone ka shitur gjithashtu një prej jahtëve të tij dhe planifikon të shesë edhe një tjetër.
“Përdorim shumë pak nga këto gjëra, vetëm një javë në vit”, ka komentuar bashkëshortja e tij, duke përkrahur vendimin.
Megjithëse zotëron ende miliarda, familja Ecclestone jeton në mënyrë modeste në një chalet me pamje nga Alpet zvicerane.
Sërish baba pas tre dekadash
Në vitin 2020, në moshën 89-vjeçare, Bernie Ecclestone u bë baba për herë të katërt. Ai ka tre vajza të rritura: Deborah (70 vjeçe) nga martesa e parë me Ivy Bamford, dhe Tamara (41) e Petra (36) nga martesa e dytë me Slavica Radic.
“Është një ndjesi e veçantë të shohësh djalin më të madh dhe më të voglin dhe të kuptosh sa shumë ka ndryshuar jeta”, ka thënë ai.
Djali i vogël, Ace, ndjek një shkollë ndërkombëtare pranë shtëpisë dhe tashmë flet anglisht, portugalisht dhe gjermanisht të Zvicrës.
Reflektime për miqësinë dhe kohën
Në një ton më intim, Ecclestone ka reflektuar mbi miqësitë e tij gjatë dekadave në Formula 1.
“Gjatë viteve njeh shumë njerëz, por miqtë e vërtetë janë të paktë. Mendoj se kam pasur katër; tani ka mbetur vetëm një”, ka pohuar ai, duke iu referuar mikut të tij të vjetër Flavio Briatore.
