Marrëdhënia mes influencueses braziliane Virginia Fonseca dhe yllit të Real Madrid, Vinicius Junior, është kthyer në një nga historitë më të komentuara në botën e showbiz-it dhe futbollit. Të dy gëzojnë një famë të jashtëzakonshme dhe një ndikim të ngjashëm në rrjetet sociale, me dhjetëra miliona ndjekës secili.
Historia e tyre nisi vitin e kaluar, pas ndarjes së Virginias nga këngëtari Zé Felipe, me të cilin ka tre fëmijë. Që prej asaj kohe, lidhja me sulmuesin e Real Madrid ka qenë vazhdimisht në qendër të vëmendjes mediatike.
Së fundmi, Virginia ka ndarë një detaj të pazakontë nga jeta e tyre në çift, duke zbuluar masat e rrepta që ndjekin për të shmangur çdo rrezik të mundshëm për karrierën sportive të Vinicius. Ajo tregoi se edhe përdorimi i produkteve mjekësore apo kozmetike kërkon kujdes ekstrem, për shkak të rregullave strikte antidoping.
Sipas saj, edhe një pomadë intime apo krem i përshkruar nga mjeku duhet të verifikohet më parë me stafin mjekësor të futbollistit, pasi substanca të caktuara, edhe në sasi minimale, mund të transferohen përmes kontaktit fizik dhe të shkaktojnë një test pozitiv antidoping.
“Kur ma shpjeguan këtë gjë, u tremba shumë. Mendova se mos kisha përdorur diçka pa e ditur. Fillova të dridhesha,” rrëfeu ajo, duke shtuar se tani çdo produkt që mendon të përdorë ia dërgon për kontroll fizioterapistëve të Vinicius.
Influencuesja zbuloi gjithashtu se kjo disiplinë shtrihet edhe në jetën e përditshme të çiftit. Vinicius shmang ngrënien jashtë shtëpisë dhe ndjek një regjim strikt ushqimor, ndërsa oraret dhe rutina e përditshme janë të planifikuara në detaje.
Sipas Virginias, ishte vetë futbollisti ai që i kërkoi këtë nivel vëmendjeje. “Çdo gjë që mendon të përdorësh, duhet të ma thuash më parë, sepse çdo substancë që bie në kontakt me mua mund të më penalizojë dhe të më nxjerrë jashtë fushës,” ka qenë mesazhi i tij.
Pavarësisht rregullave strikte, Virginia u shpreh se është shumë e lumtur në këtë marrëdhënie dhe se bën gjithçka për ta bërë atë të funksionojë. “Është një lidhje që kërkon shumë disiplinë dhe përkushtim. Duhet të ndjekësh gjithçka me përpikmëri, por jam e qetë dhe e lumtur,” përfundoi ajo.