Autoritetet kanë nisur autopsinë për një nga pesë zhytësit italianë që humbën jetën gjatë një ekspedite tragjike në një shpellë nënujore në Maldive, ndërsa ekspertët po përpiqen të zbulojnë shkaqet e katastrofës. Pesë turistët italianë humbën jetën teksa eksploronin një shpellë të njohur si shark cave, rreth 60 metra nën sipërfaqen e detit, një thellësi që sipas raportimeve tejkalonte kufijtë e lejuar lokalë.
Sipas mediave italiane, një nga viktimat, profesorja Monica Montefalcone, dyshohet se kishte veshur një kostum të papërshtatshëm për zhytje në thellësi të mëdha. Ekspertët po hetojnë nëse kjo mund të ketë ndikuar në tragjedi. Një tjetër teori e ngritur nga specialistët lidhet me të ashtuquajturin efekt Venturi, një fenomen që krijon rryma shumë të forta dhe efekt thithës në hapësira të ngushta nënujore. Sipas ekspertëve, zhytësit mund të jenë tërhequr brenda shpellës dhe të kenë mbetur pa oksigjen gjatë përpjekjeve për të dalë.
Mes viktimave janë Monica Montefalcone, vajza e saj 22-vjeçare Giorgia Sommacal, Gianluca Benedetti, Federico Gualtieri dhe Muriel Oddenino. Operacioni i rikuperimit zgjati disa ditë dhe u vështirësua nga moti i keq. Gjatë kërkimeve humbi jetën edhe një zhytës i forcave të armatosura të Maldiveve, Mohamed Mahudhee, i cili pësoi komplikacione nga dekompresioni gjatë operacionit të shpëtimit. Autoritetet italiane kanë nisur tashmë një hetim për vrasje nga pakujdesia, ndërsa kamerat GoPro të gjetura pranë viktimave pritet të ndihmojnë në rindërtimin e momenteve të fundit të ekspeditës fatale.