Olivia Rodrigo ka shënuar një tjetër sukses të madh në karrierën e saj, duke kryesuar për herë të tretë renditjen prestigjioze të albumeve Billboard 200 me projektin e saj më të ri, You Seem Pretty Sad for a Girl So in Love.

Albumi, i publikuar më 12 qershor, debutoi menjëherë në vendin e parë të klasifikimit amerikan, duke grumbulluar 485 mijë njësi ekuivalente albumi në javën e parë. Ky rezultat përbën javën më të suksesshme të karrierës së artistes dhe debutimin më të mirë për një album solo gjatë këtij viti.

Suksesi i albumit u mbështet edhe nga publikimi i 15 versioneve të ndryshme fizike. Veçanërisht të forta rezultuan shitjet, të cilat arritën në 164 mijë kopje, duke shënuar javën më të mirë të Olivia Rodrigos në këtë format dhe njëkohësisht performancën më të fortë të shitjeve të vinileve nga një artiste femër gjatë vitit.

Kjo është hera e tretë që këngëtarja arrin të kryesojë Billboard 200. Më parë ajo kishte debutuar në vendin e parë me albumin Sour në vitin 2021, i cili regjistroi 295 mijë njësi, ndërsa në vitin 2023 përsëriti suksesin me Guts, që grumbulloi 302 mijë njësi në javën e parë.

Përpara publikimit të albumit të ri, Rodrigo prezantoi dy këngë që tërhoqën menjëherë vëmendjen e publikut. Drop Dead arriti të kryesojë klasifikimet muzikore, ndërsa The Cure u rendit deri në vendin e pestë.

Artistja po përgatitet gjithashtu për turneun e saj të ardhshëm koncertor, The Unraveled Tour, i cili do të nisë më 25 shtator në Hartford. Turneu do të përfshijë qytete të ndryshme në Amerikën e Veriut përpara se të zhvendoset në Evropë gjatë vitit 2027.

Ndërkohë, suksesi i albumit të ri ka sjellë ndryshime edhe në renditjen e Billboard 200. Albumi i Olivia Rodrigos ka zbritur nga vendi i parë Drake me albumin Iceman, i cili kishte qëndruar në krye për katër javë radhazi dhe tashmë renditet në vendin e dytë.

Në pozicionin e tretë renditet Dandelion i Ella Langley, ndërsa pesëshja e parë plotësohet nga I’m the Problem i Morgan Wallen dhe The Great Divide i Noah Kahan.

Me këtë debutim rekord, Olivia Rodrigo konfirmon edhe një herë statusin e saj si një nga artistet më të suksesshme dhe më me ndikim të muzikës pop në nivel global.