Një operacion i gjerë ndërkombëtar ka goditur një nga rrjetet më të mëdha kriminale në Evropë, të njohur si organizata Baybaşin, e cilësuar shpesh si “Escobari i Evropës”. Aksioni është zhvilluar në bashkëpunim mes autoriteteve turke dhe Europol, duke përfshirë njëkohësisht disa vende si Italia, Polonia, Franca, Mbretëria e Bashkuar dhe Zvicra.
Operacioni është fokusuar në një rrjet të gjerë të kontrabandës së cigareve, ku sipas hetimeve, organizata kishte ndërtuar një sistem të strukturuar për trafikimin dhe pastrimin e parave në disa shtete. Autoritetet kanë zbuluar se drejtuesit e grupit kriminal kishin investuar të ardhurat e paligjshme në kompani dhe pasuri të paluajtshme, duke tentuar të fshehin origjinën e tyre.
Si rezultat i hetimeve, janë identifikuar disa të dyshuar, ndërsa është urdhëruar sekuestrimi i aksioneve të kompanive, pronave, automjeteve, llogarive bankare dhe aseteve në kriptovaluta. Operacioni është koordinuar nga strukturat kundër krimit të organizuar dhe prokuroria përkatëse, duke shënuar një goditje të fortë ndaj një rrjeti që operonte në disa vende njëkohësisht. Autoritetet theksojnë se lufta kundër krimit të organizuar do të vijojë me të njëjtin intensitet, duke synuar çmontimin e plotë të strukturave të tilla kriminale në nivel ndërkombëtar.