Turneu i Ed Sheeran është përfshirë nga një valë largimesh, pasi disa prej artistëve të planifikuar për të hapur koncertet e tij kanë njoftuar se nuk do të vazhdojnë më bashkëpunimin. Vendimet pasojnë përjashtimin e reperit Macklemore nga datat e ardhshme të turneut.
Çështja nisi pas deklaratave pro-palestineze të Macklemore gjatë një performance në New Jersey, të cilat shkaktuan reagime dhe kundërshtime nga disa prej organizatorëve dhe drejtuesve të stadiumeve ku ishin planifikuar koncertet.
Finneas ishte ndër të parët që njoftoi se nuk do të merrte më pjesë. Artisti ishte parashikuar të hapte gjashtë nga koncertet e Ed Sheeran në Amerikën e Jugut gjatë muajit nëntor. Duke bërë publik vendimin, ai shprehu gjithashtu mbështetjen e tij për Palestinën dhe popullin palestinez.
Largimet vijuan me artistin irlandez Aaron Rowe, i cili ishte pjesë e programit për dhjetë koncertet e mbetura në Amerikën e Veriut.
Nga turneu amerikan u tërhoq më pas edhe grupi irlandez Beoga. Listës iu shtua më vonë edhe grupi danez Lukas Graham, duke zgjeruar numrin e artistëve që hoqën dorë nga performancat e planifikuara.
Vendimet u bënë publike vetëm disa orë pasi vetë Ed Sheeran kishte sqaruar versionin e tij për atë që kishte ndodhur me Macklemore.
Sipas Sheeran, disa prej pronarëve të stadiumeve kishin bërë të ditur se nuk ishin të gatshëm të zhvillonin koncertet nëse reperi amerikan mbetej pjesë e turneut. Këngëtari britanik tha se ishin bërë përpjekje për të gjetur një rrugëzgjidhje, por kundërshtimi i drejtuesve të ambienteve kishte mbetur i pandryshuar.
Sheeran mori gjithashtu përgjegjësinë për vendimin përfundimtar për largimin e Macklemore. Ai argumentoi se anulimi i koncerteve do të prekte jo vetëm publikun që kishte blerë bileta, por edhe ekipin e turneut dhe artistët e tjerë të angazhuar në të.
Në debat është përfshirë edhe Robert Kraft, pronari i New England Patriots dhe Gillette Stadium.
Kraft tha se kundërshtimi ndaj pjesëmarrjes së Macklemore nuk lidhej vetëm me deklaratat e tij të fundit, por edhe me atë që ai e cilësoi si një histori të retorikës dhe imazheve antisemite nga ana e reperit. Ky është vlerësimi i Kraft, ndërsa ai deklaroi gjithashtu se do të ishte i gatshëm të zhvillonte një bisedë me Macklemore.
Situata ka krijuar kështu një efekt zinxhir në turneun e Ed Sheeran, me disa prej artistëve të ftuar që kanë zgjedhur të tërhiqen pas përjashtimit të Macklemore.