Anthony Joshua doli fitues nga përballja spektakolare ndaj Jake Paul në Kaseya Center në Miami, duke e mbyllur duelin në raundin e gjashtë pas një goditjeje të fuqishme që e detyroi amerikanin të ndalojë dhe të kërkojë ndihmë mjekësore. Ndeshja, e zhvilluar në peshën e rëndë dhe jashtë titujve botërorë, u ndoq me interes të jashtëzakonshëm.
Anthony Joshua u shfaq i kujdesshëm në raundet e para, duke pranuar më pas se mungesa e ringut prej më shumë se një viti ishte ndierë. Megjithatë, me kalimin e minutave, britaniku rriti ritmin dhe në raundin e gjashtë gjeti goditjen vendimtare që e rrëzoi kundërshtarin dhe i dha fund ndeshjes.
Jake Paul tregoi rezistencë dhe guxim, duke arritur të qëndrojë në këmbë për gjashtë raunde përballë një prej emrave më të mëdhenj të peshës së rëndë. Pas ndeshjes, ai u dërgua në spital për kontrolle mjekësore dhe pritet të qëndrojë disa javë jashtë ringut për rikuperim. Paul deklaroi se nuk ishte i zhgënjyer nga paraqitja e tij dhe se synon të vazhdojë karrierën në kategori më të ulëta peshe.
