I dënuari britanik për abuzime seksuale, Gary Glitter, raportohet se ndodhet në gjendje shumë të rëndë shëndetësore në burg. 81-vjeçari, emri i vërtetë i të cilit është Paul Francis Gadd, po vuan dënimin në burgun HMP Channings Wood në Devon, ku sipas burimeve ai është pothuajse i shurdhër, me lëvizshmëri shumë të kufizuar dhe i detyruar të përdorë karrocë invalidi.
Gjendja e tij fizike është përkeqësuar ndjeshëm, ndërsa shumë persona në ambientet e burgut besojnë se ai mund të mos dalë më i gjallë prej andej. Ai kalon pjesën më të madhe të kohës i izoluar, deri në 23 orë në ditë në qeli, për arsye sigurie.
I dënuari u dënua në vitin 2015 me 16 vite burg për abuzime ndaj tri vajzave të mitura gjatë viteve 1975-1980. Ai u lirua përkohësisht në vitin 2023, pasi kishte kryer gjysmën e dënimit, por u rikthye në burg vetëm pak javë më vonë për shkelje të kushteve të lirimit.
Në vitin 2025, kërkesa e tij për lirim me kusht u refuzua sërish, me autoritetet që vlerësuan se ai vazhdon të paraqesë rrezik për shoqërinë. Sipas vendimit aktual, ai pritet të qëndrojë në burg të paktën deri në vitin 2031, ndërsa gjendja e tij shëndetësore mbetet një çështje shqetësuese që mund të ndikojë në zhvillimet e mëtejshme të rastit.