Dy protagonistët e dokumentarit të Netflix “Skywalkers: A Love Story”, Angela Nikolau dhe Ivan “Vanya” Beerkus, janë arrestuar pasi u ngjitën ilegalisht në antenën e Empire State Building në Nju Jork për të realizuar një propozim martese. Ngjarja ndodhi mesditën e 1 korrikut, kur çifti, i veshur me të zeza, u ngjit në majën e antenës së ndërtesës, rreth 443 metra mbi tokë. Pamjet e transmetuara nga helikopterët e mediave i treguan duke qëndruar në strukturën metalike pa u dukur të lidhur me pajisje sigurie. Në majë të ndërtesës ata shpalosën një pankartë me mbishkrimin: “Kur fuqia e dashurisë mposht dashurinë për pushtetin, bota njeh paqen.”
Më pas çifti u pa duke puthur njëri-tjetrin, duke bërë fotografi dhe selfie, ndërsa pasi zbritën në një platformë më të gjerë, Beerkus u ul në një gju dhe i propozoi martesë Nikolaut. Momenti tërhoqi menjëherë vëmendjen në rrjetet sociale edhe për faktin se Nikolau mbante një maskë të zezë, duke sjellë krahasime me personazhin Catwoman.
Pas zbritjes, policia e Nju Jorkut i arrestoi të dy pa incidente. Deri më tani nuk është bërë e ditur se si arritën të hynin në pjesën e mbyllur të antenës së Empire State Building, ndërsa autoritetet kanë konfirmuar se ndaj tyre pritet të ngrihen akuza. Angela Nikolau dhe Ivan Beerkus njihen ndërkombëtarisht si pjesë e komunitetit të ashtuquajtur “rooftoppers”, persona që ngjiten ilegalisht në rrokaqiej dhe struktura shumë të larta pa përdorur pajisje sigurie. Historia e tyre u bë e njohur për publikun e gjerë përmes dokumentarit të Netflix “Skywalkers: A Love Story” (2024), i cili ndjek marrëdhënien e çiftit dhe pasionin e tyre për ngjitjet ekstreme në disa prej ndërtesave më të larta në botë.