Traditat festive të familjes mbretërore britanike nuk ishin aspak të dashura për Princeshë Dianën. Diana i konsideronte disa nga këto zakone si të sikletshme dhe madje frikësuese. Festimet e Krishtlindjeve dhe të Vitit të Ri zhvilloheshin tradicionalisht në Sandringham Palace, ku ekzistonte një rregull i pashkruar; askush nuk duhej të shkonte për të fjetur para Mbretëreshës. Ky ritual, sipas burimeve pranë oborrit mbretëror, ishte veçanërisht i vështirë për Dianën.
Ish-sekretari privat i Mbretëreshës, William Heseltine, ka treguar se mbrëmjet e gjata mbretërore ishin një torturë për të. Sipas tij, familja kalonte orë të tëra e ulur në sallon duke bërë biseda formale, ndërsa askush nuk guxonte të largohej përpara Mbretëreshës. Diana, e lodhur nga kjo situatë, herë pas here justifikohej dhe shkonte për të fjetur, një veprim që shihej si shkelje e etiketës mbretërore.
Përveç kësaj, festimet përfshinin edhe një sërë aktivitetesh tradicionale, nga pjesëmarrja në shërbesat fetare në kishën St. Mary Magdalene, deri te lojërat e sallonit dhe aktivitetet e gjuetisë. Një nga zakonet më të veçanta ishte e ashtuquajtura lucky dip, një lojë fati ku secili anëtar i familjes nxirrte një letër me parashikime për vitin e ardhshëm dhe e lexonte me zë të lartë.
Sipas njohësve të familjes mbretërore, Diana shpesh përpiqej t’i shmangej këtyre ritualeve, duke kërkuar mënyra për t’u larguar nga atmosfera formale që e bënte të ndihej e parehatshme. Këto detaje hedhin dritë mbi vështirësitë personale të Princeshës së Uellsit për t’u përshtatur me jetën dhe traditat strikte të oborrit mbretëror.
Princesha Diana humbi jetën tragjikisht në një aksident automobilistik më 31 gusht 1997.