Një influencer i njohur brazilian është përfshirë në një skandal të pazakontë, pasi është ndëshkuar me një gjobë prej rreth 150 mijë paundësh për një video të publikuar në rrjetet sociale. Carlinhos Maia filmoi dhe më pas publikoi pamjet ku dy persona ushqenin zogj të egër me mish të pjekur gjatë një udhëtimi me varkë. Videoja, që u bë virale, tërhoqi menjëherë vëmendjen e autoriteteve mjedisore në Brazil.
Sipas zyrtarëve, veprimi konsiderohet krim mjedisor, pasi ushqimi i kafshëve të egra me produkte jo natyrale mund të dëmtojë shëndetin e tyre dhe të prishë ekuilibrin ekologjik. Për më tepër, ndikimi i madh i influencerit në rrjetet sociale, me mbi 35 milionë ndjekës, ka ndikuar në rritjen e masës së gjobës. Autoritetet sqaruan se edhe personat që ushqyen fizikisht zogjtë janë gjobitur veçmas, ndërsa Maia është ndëshkuar për publikimin dhe përfitimin nga përmbajtja.
Nga ana e tij, influenceri e ka cilësuar vendimin si të padrejtë dhe ka deklaruar se nuk ka qenë ai që i ushqeu zogjtë. Ai ka bërë të ditur se do ta kundërshtojë gjobën në gjykatë, duke argumentuar se raste të ngjashme më parë janë ndëshkuar me gjoba shumë më të ulëta.