Aktorja amerikane Angelina Jolie ka thënë se nuk pendohet për vendimin e saj për të hequr vezoret dhe për t’iu nënshtruar një mastektomie të dyfishtë (heqje të gjirit). Ajo iu nënshtrua këtyre operacioneve parandaluese pasi mësoi se ka gjenin e rrallë BRCA (Geni i Kancerit të Gjirit), i cili rrit rrezikun e kancerit të gjirit dhe vezoreve. “Vendosa ta bëj operacionin sepse humba nënën dhe gjyshen shumë të re. Unë kam gjenin BRCA, kështu që 10 vjet më parë vendosa të bëja një mastektomi të dyfishtë. Pastaj hoqa edhe vezoret, sepse kjo është ajo që i mori nënës sime”, tha ajo në një intervistë.
Nëna e saj, Marcheline Bertrand, ndërroi jetë në vitin 2007 në moshën 56 vjeçare, pas një beteje me kancerin e gjirit dhe të vezoreve. Angelina Jolie shtoi se nuk i dënon ata që zgjedhin mënyra të tjera për të luftuar rrezikun e këtyre sëmundjeve të liga. “Këto janë zgjedhjet e mia. Nuk po them që të gjithë duhet të bëjnë të njëjtën gjë, por është e rëndësishme të kesh një zgjedhje dhe nuk pendohem për këtë”-tha ajo. Në filmin e saj të ri, “Couture”, aktorja luan rolin e Maxine, e cila josh kolegen e saj ndërsa lufton me diagnozën e kancerit të gjirit dhe përballet me kimioterapi, rënie të flokëve dhe sfida të tjera.
“Mendoj se ka shumë për të thënë rreth kësaj dhe se është bashkuese jo vetëm për gratë, por për këdo që ka kaluar diçka ose për dikë që ndihet i prekshëm dhe i vetmuar. Ka diçka shumë specifike në lidhje me kancerin tek gratë, sepse padyshim që na prek ne dhe mënyrën se si ndihemi si gra”, tha ajo.