Një çift që vendosi të shesë gjithçka që zotëron për të jetuar një jetë luksoze në një anije lundrimi, ka zbuluar sfidën kryesore me të cilën përballet me jetën e tyre të re në det. Në mars të vitit 2023, Monica Brzoska dhe bashkëshorti i saj Jorell Conley u shpallën “udhëtarë me kohë të plotë në anije lundrimi”, në përpjekje për të udhëtuar nëpër botë.

Çifti nga Tennessee, që ishte ende në të 30-at e tyre, lanë punën si mësues dhe shitën pothuajse çdo send që zotëronin për të nisur një aventurë përmes dhjetëra vendeve dhe për të “jetuar si milionerë”. Gjatë dy viteve e gjysmë të fundit, ata kanë vizituar 45 vende në më shumë se 100 udhëtime me anije, duke dokumentuar përvojat e tyre mbresëlënëse në rrjetet sociale, ku kanë fituar një numër të madh ndjekësish.

Megjithatë, jeta e tyre në një “hotel lundrues” nuk ka qenë gjithmonë e përsosur. Edhe pse nuk kanë më nevojë të gatuajnë, të pastrojnë apo të lajnë rrobat, çifti ka zbuluar se përballet me një pengesë të madhe: mungesën e ndjenjës së “shtëpisë.”

Është e vështirë të imagjinohet se çfarë mund t’i shqetësojë, sidomos kur Monica pranon se vendimi më i vështirë i ditës për të është “nëse do ta kalojë kohën pranë pishinës, në spa apo në plazh.”

Por, duke folur për The Sun, ajo tha se pjesa më e vështirë është ndjenja e mallit për familjen.

“Sigurisht që ka sfida,” pranoi Monica. “Na merr malli për familjet tona, por e dimë që mund të kthehemi në shtëpi në rast emergjence.”

Për të financuar mënyrën e tyre të jetesës, ajo tregoi se ata japin me qira shtëpinë e tyre me tre dhoma gjumi në Memphis, duke fituar midis 1,200 dhe 1,900 dollarë në muaj, ndërsa përpiqen të mbajnë shpenzimet sa më të ulëta duke zgjedhur kabina më të lira dhe duke përfituar nga zbritjet.

Falë kësaj strategjie, çifti arriti të shijojë një “pension të parakohshëm” për vetëm 10,000 dollarë në tetë muajt e parë, një shumë që përfshinte akomodimin, ushqimin dhe argëtimin në 36 udhëtime me anije. Sa i përket fillimit të kësaj aventure, ata thanë se gjithçka nisi pasi u dashuruan me udhëtimin e tyre të parë dhe nuk u kthyen më pas pasi u nisën nga Miami.

“U ndjeva menjëherë e lirë,” rrëfeu Monica. “Nuk dinim sa do të na zgjaste buxheti, por vendosëm të shijonim çdo minutë. Shpejt u mësuam me ritmin e jetës së re. Më parë kishim plane mësimore, gatim dhe pastrim, por tani gjithçka ishte zhdukur.”

Në fund, Monica tha se ky hap ka qenë “një ëndërr e bërë realitet.”