Një burrë në provincën Hunan të Kinës u përpoq t’i shpëtonte dënimit për drejtim mjeti në gjendje të dehur duke inskenuar vdekjen dhe funeralin e tij, por plani i pazakontë përfundoi me arrestimin dhe dënimin e tij. Sipas policisë kineze, burri me mbiemrin Si u ndalua në janar të vitit të kaluar duke drejtuar automjetin nën efektin e alkoolit. Verifikimet zbuluan se ai ishte kapur edhe dy herë më parë duke drejtuar pa leje dhe në gjendje të dehur, çka e ekspozonte ndaj një dënimi me burg për shkeljen e tretë.
Ndërsa ndodhej në liri me kusht, Si vendosi të inskenonte vdekjen e tij për t’iu shmangur drejtësisë. Me ndihmën e familjes, ai bleu një arkivol dhe krijoi skenën e një mbidoze të supozuar. Në banesë vendosi shishe bosh ilaçesh, u stërvit të mbante frymën për periudha të gjata dhe përdori pajisje ftohëse për ta mbajtur trupin të ftohtë, në mënyrë që të dukej sikur kishte ndërruar jetë.
Edhe pse disa fqinj thanë se e kishin parë trupin, nëna dhe gjyshja e tij nuk lejuan askënd t’i shihte fytyrën, duke pretenduar se ilaçet e kishin deformuar atë. Funerali u zhvillua po atë ditë. Ndërsa arkivoli po zbritej në varr, Si ishte tashmë rrugës drejt provincës Yunnan.
Megjithatë, policia vuri re disa mospërputhje. Hetuesit zbuluan se arkivoli ishte blerë përpara “vdekjes”, familja nuk kishte njoftuar as ambulancën dhe as policinë, nuk ishte lëshuar certifikatë vdekjeje dhe nuk ekzistonte asnjë dokument që provonte kremimin e trupit. Dyshimet u forcuan edhe nga fakti se askush nga fqinjët nuk e kishte parë fytyrën e të ndjerit gjatë ceremonisë mortore.
Pamjet e kamerave të sigurisë dhe të dhënat bankare konfirmuan më pas se Si ishte ende gjallë, duke bërë që policia të niste kërkimet për kapjen e tij. Ai u arrestua në prill të këtij viti dhe u dënua me pesë muaj paraburgim si dhe me një gjobë prej 20 mijë juanësh, rreth 3 mijë dollarë.