Supermodelja e njohur Heidi Klum, ka ndarë me ndjekësit e saj një nga ritualet më të pazakonta të mëngjesit. Në një video të postuar në Instagram Stories, Klum e quajti vaktin e saj “mëngjesin e kampionave” dhe në qendër të pjatës ishin pikërisht qepët. Pjata përfshinte dy vezë të ziera, avokado, domate qershi, selino, sallatë jeshile dhe qepë të freskëta, të spërkatura me një salcë që dukej si uthull me erëza. Krahas perimeve, ajo konsumoi edhe një fetë buke të lyer me një krem djathi.
Sipas National Onion Association, kombinimi i vezëve me qepë është i shëndetshëm, pasi qepa është e pasur me vitaminë C, antioksidantë dhe fibra prebiotike që ushqejnë bakteret e mira në sistemin tretës. Këto fibra ndihmojnë në përmirësimin e tretjes, përthithjen e lëndëve ushqyese dhe forcimin e imunitetit. Shoqata nënvizon gjithashtu se qepët kanë pak kalori, një detaj i parëndësishëm për Klum, e cila ka treguar më parë se “nuk ka numëruar kurrë kaloritë”.
Edhe pse Klum thotë se nuk ndjek një dietë të rregullt, ajo ka zbuluar së fundmi në një intervistë për The Wall Street Journal se, bashkë me bashkëshortin Tom Kaulitz, ka nisur një “pastrim ndaj krimbave dhe parazitëve”, një proces që sipas saj “duhet bërë për disa muaj”. Supermodelja u shpreh se postimet që i shfaqen në Instagram e nxitën ta provonte këtë metodë, e cila përfshin përdorim të barishteve, karafilit, farave të papajës dhe produkteve që ndihmojnë në “çmetalim”. Me zakone të pazakonta ushqimore dhe rituale të papritura wellness-i, Heidi Klum vazhdon të tërheqë vëmendjen e publikut, këtë herë me një mëngjes që ka ndezur kuriozitetin e fansave në mbarë botën.