Një aksident fatal ka ndërprerë Rally Mille Miglia në Itali. Ngjarja ndodhi pasditen e së shtunës, 5 shtator, në Bione, në zonën e Valsabbias, në provincën e Brescias, ku një makinë që merrte pjesë në garë doli nga rruga në një kthesë dhe goditi një spektator që ndodhej pranë itinerarit.
Pavarësisht ndërhyrjes së menjëhershme të ekipeve të emergjencës, personi i përplasur nuk mundi të mbijetojë. Sipas informacioneve të para të raportuara nga mediat italiane, viktima ishte një 63-vjeçar nga Torino, i cili kishte udhëtuar drejt Brescias së bashku me bashkëshorten për të ndjekur garën.
Identiteti i tij nuk ishte bërë ende zyrtarisht publik nga autoritetet në momentin e raportimeve të para. Aksidenti ndodhi gjatë një prej provave speciale të Rally Mille Miglia. Sipas rindërtimit paraprak, makina doli nga traseja në një kthesë dhe përfundoi në zonën ku ndodheshin spektatorët. Autoritetet kanë nisur verifikimet për të përcaktuar me saktësi dinamikën e ngjarjes.
Pas aksidentit, drejtimi i garës vendosi ta pezullojë menjëherë aktivitetin dhe më pas ta ndërpresë atë. Programi parashikonte përfundimin e tetë etapave speciale gjatë pasdites së së shtunës, me mbërritjen në Piazzale Arnaldo në Brescia.
Vetëm pak orë para aksidentit fatal ishte regjistruar edhe një tjetër incident, ku një makinë kishte përfunduar në një greminë, por pa pasoja të rënda. Ngjarja ka ndërprerë zhvillimin e edicionit të 49-të të Rally Mille Miglia, ndërsa vijojnë hetimet për rrethanat e plota të aksidentit.