Një ngjarje tronditëse ka ndodhur në shtetin e Maryland në SHBA, ku një kujdestar 22-vjeçar akuzohet për vrasjen e qëllimshme të një milioneri filantrop, pasi dyshohet se u maskua si grua për të kryer krimin. Sipas autoriteteve, Marquis Emilio James është arrestuar dhe akuzohet për vrasjen e Robert G. Fuller Jr., 87 vjeç, i cili u qëllua për vdekje në apartamentin e tij brenda kompleksit të të moshuarve Cogir Potomac Senior Living gjatë ditës së Shën Valentinit.
Pamjet e kamerave të sigurisë tregojnë një person të maskuar me paruke të gjatë të zezë duke hyrë dhe dalë nga oborri i mbyllur përmes një dere, alarmi i së cilës rezultoi i çaktivizuar. Hetuesit dyshojnë se i dyshuari kishte manipuluar sistemin e sigurisë për të hyrë pa u vënë re. James kishte punuar si teknik i shpërndarjes së medikamenteve në këtë qendër që prej tetorit dhe kujdesej çdo natë për viktimën. Policia deklaroi se nga banesa e të moshuarit nuk mungonte asgjë, duke përjashtuar motivin e grabitjes.
Dyshimet ndaj tij u forcuan disa ditë më vonë, kur ai u ndalua nga policia rrugore për mungesë targash në automjet. Sipas autoriteteve, i riu doli nga makina dhe qëlloi dy herë ndaj një efektivi policie, duke e plagosur lehtë, përpara se të arratisej. Në vendngjarje u gjet një gëzhojë që përputhej me provat balistike të përdorura në vrasjen e Fuller, duke lidhur drejtpërdrejt dy rastet. Pas një ndjekjeje nga policia lokale, policia shtetërore dhe marshals amerikanë, i dyshuari u arrestua në Rockville.
Gjatë kontrolleve në banesë, hetuesit gjetën disa paruke dhe një maskë që dyshohet se janë përdorur për maskimin gjatë krimit. Prokuroria e ka akuzuar për vrasje të shkallës së parë dhe nëse shpallet fajtor, ai rrezikon burgim të përjetshëm. Autoritetet thanë se ende nuk është zbuluar motivi i qartë i krimit, pasi i dyshuari kishte deklaruar se marrëdhënia e tij me viktimën ishte shumë e mirë dhe se nuk do ta dëmtonte kurrë atë.